تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
پاکستان کې اقتصادي کړکېچ؛ حکومت له خلکو غوښتي چې چای کم وڅښي
پاکستان کې له خلکو غوښتل شوي چې له خراب اقتصاد سره مرستې لپاره د چای څښلو اندازه راکمه کړي.
د پاکستان کابینه کې ارشد وزیر احسان اقبال ویلي د کم چای څښل پر دغه هېواد د وارداتو لوړ لګښت راکمولو کې مرسته کولی شي.
پاکستان د بهرنیو اسعارو د زېرمو جدي کمښت سره مخ دی او په اوسنيو ذخایر یې یوازې تر دوو میاشتو کمې مودې لپاره ټول اړتیا وړ واردات شوني دي.
پاکستان د نړۍ په کچه د چای تر ټولو ستر واردونکی دی او تېر کال یې له ۶۰۰ میلیونو ډېر ډالر د چایو په وارداتو لګولي دي.
د ځايي رسنیو د رپوټونو له مخې ښاغلي اقبال ویلي "له ولس غواړم چې د چای مصرف د ورځې یو دوه پیالې راکم کړي، ځکه موږ چای په پور واردوو."
هغه همدا راز وړاندیز کړی چې هټیوال او کاروباریان د برېښنا د سپما لپاره کولی شي چې پلورنځي د شپې پر لس نیمو بجو وتړي.
دا غوښتنې داسې مهال کېږي چې د پاکستان د بهرنیو اسعارو زېرمې په چټکۍ د کمېدو په حال کې دي.
دې اقتصادي ربړې پر حکومت فشار ډېر کړی چې هېواد کې د پېسو پاتې کېدو او د وارداتو لوړ لګښت کمولو لپاره لارې چارې ولټوي.
پاکستان کې پر خواله رسنیو د کم چای څښلو په وړاندیز تاوده بحثونه روان دي، او ډېر دا پوښتنه رامخته کوي چې د کم چای څښتل دغه هېواد سره له ورپېښو مالي ستونزو وتلو کې څومره مرسته کولی شي.
د پاکستان د بهرنیو اسعارو د تبادلې زېرمې چې فبرورۍ کې شاوخوا ۱۶ میلیارد ډالرو ته رسېدې، د روانې جون میاشتې لومړۍ اوونۍ کې تر ۱۰ میلیارد ډالرو هم راکمې شوې، چې له دوو میاشتو هم کمې مودې لپاره د ټولو اړتیا وړ وارداتي توکو لګښت پوره کولی شي.
تېره میاشت کراچۍ کې چارواکو د لسګونو غیر ضروري لوکس توکو په وارداتو محدویت ولګاوه چې هېواد کې یې د پیسو ساتلو سره یې مرسته کړې وي.
له اوسني اقتصادي کړکېچ د پاکستان ایستل د شهباز شریف حکومت ته ستره ازموېنه ده.
هغه تېره اپرېل میاشت د قامي اسمبلۍ لخوا د مخکیني لومړي وزیر عمران خان له بېواکه کېدو وروسته د واک واګي لاس کې واخیستل.
ښاغلي شریف تر لوړې لنډ وخت وروسته د عمران خان حکومت تورن کړ چې ګواکې په ناسم مدیریت یې اقتصاد له پښو غورځولی او بېرته درول یې ستره ننګونه ده.
د هغه حکومت تېره اوونۍ د ۴۷ میلیارد ډالرو نوې بودیجه اعلان کړه او هڅه کوي چې له پیسو نړیوال صندوق (ای اېم اېف) د ۶ میلیارد ډالرو پور ترلاسه کېدو درېدلی پروګرام بېرته پیل شي.
خو ای اېم اېف د دغو پیسو ورکړې ته ځینې شرطونه ایښي او د پاکستان مالي سیستم کې د وضاحت رامنځ ته کېدو غوښتنه کوي.
