تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
زېلینسکي: روسیې د اوکرایین پر ختیځ بریدونه پیل کړل
د اوکرایین ولسمشر ولودیمر زېلینسکي وايي، روسیې د اوکرایین ختیځ کې د دنباس سیمې نیولو لپاره برید پیل کړی دی.
روسیې پرون دوشنبه د اوکرایین پر بېلا بېلو ښارونو بمبارۍ وکړې او اوکرایین ولسمشر زېلینسکي په یوه ویډیويي پیغام کې وویل ''د دنباس لپاره جګړه پیل شوې. ''
د اوکرایین لوړپوړي دفاعي چارواکي په ورته مهال ویلي، روسي ځواکونو هڅه کړې، چې په سیمه کې د اوکراییني پوځ دفاعي کرښې ماتې کړي.
د کیېف په نیولو کې د روسي پوځ له پاتې راتلو وروسته پر دنباس د روسیې برید وېره څرګندېده.
په لومړي سر کې داسې ښکاریده، چې روسیه غواړي د اوکرایین لوی ښارونه ونیسي او د دې هېواد حکومت نسکور کړي.
خو د اوکراییني ځواکونو له کلک مقاومت وروسته روسي دفاعي چارواکو وویل، ''د عملیاتو لومړي پړاو کې '' یې ''په عام ډول هدفونه ترلاسه کړی دي '' ځکه یې د اوکرایین پلازمېنې له شاوخوا خپل پوځونه وایستل.
دوی له هغه وروسته دا هم وویل، چې د دنباس سیمې ''خپلواکۍ '' ته یې پام اړولی، چې ډېری اوسېدونکي یې روسي ژبي دي.
د روسیې ولسمشر ولادیمر پوتین پر اوکرایین خپل یرغل ته د اوکرایین غیر پوځي کولو او له هغه ځایه د ''ناتزي ایزم '' له منځه وړلو عملیاتو نوم ورکړ، خو اوکرایین او متحدینو یې دا پر ګاونډي هېواد د یرغل لپاره د روسیې ولسمشر پلمه وبلله.
پر دوشنبه روسي ځواکونو کرۍ ورځ پر یو شمېر ختیځو ښارونو توغندیز او راکټي بریدونه وکړل، چې له کبله د نباس په لوهانڅک او دونیڅک کې اته ملکي کسان وژل شوي دي.
بل لور په لوېدیځ لفیېف ښار کې هم د روسي ځواکونو د څلورو بریدونو له کبله اووه کسان وژل شوي او ۱۱ نور ټپیان دي.
روسي ځواکونو د اوکرایین په نورو ښارونو کې هم ورته بریدونه کړي دي.
