روسیې پر اوکرایین بشپړ یرغل پیل کړی

د روسیې ولسمشر ولادیمر پوتین په اوکرایین کې د 'پوځي عملیاتو پیل ' اعلان کړ. نوموړي د اوکرایین ختیځ کې د دغه هېواد له پوځیانو غوښتي چې وسله پر ځمکه کېږدي او کورونو ته ستانه شي.

د اوکرایین لویو ښارونو په شاوخوا کې د چاودونو رپوټونه ورکړل شوي دي.

د اوکرایین سرحدي ځواک وايي، د روسیې پوځي کاروانونه د اوکرایین ختیځ کې د لوهانسک او خرکیف او دغه راز په شمال کې د چیرنهیف او سومي سیمو ته ننوتي دي.

دغه ځواک وايي، د روسیې له پوځي مداخلې سره د توپخانې ګوزارونه هم یو ځای شوي دي.

د مسوولینو په وینا د اوکرایین پوله ساتو ځواکونو یو شمېر کسان له همدې امله ټپیان شوي دي.

د اوکرایین پوله ساتونکو ځواکونو په وینا دوی او د هېواد دفاعي ځواکونه ''د دښمن مخنیوي لپاره ټول اړین اقدامات کوي. ''

له دې مخکې د روسیې ولسمشر ولادیمر پوتین په یوه ټلویزیوني وینا کې وویل، د اوکرایین اشغال کولو پلان نه لري، خو په وینا یې که هر چا یې مخه ونیوه، د مسکو غبرګون به 'چټک 'وي.

د ولسمشر پوتین له دې وینا سملاسي وروسته د اوکرایین پوځ پر هدفونو د بریدونو رپوټونه ورکړل شول.

بل لور اوکرایین وايي، روسیې پر دغه هېواد بشپړ یرغل کړی.

د پنجشنبې پر سهار د اوکرایین ولسمشر ولودودیمر زیلنسکي په یوه ویډیويي پیغام کې وویل:

''موږ پیاوړي یو، ډار نه دی پکار، هر څه ته چمتو یو، موږ به هر چا ته ماتې ورکړو، ځکه موږ اوکرایین یو. ''

نوموړي وویل، روسیې د اوکرایین پر پوځي تاسیساتو او پوله ساتو ځواکونو بریدونه کړي دي.

بل لور د نورو ښارونو په شاوخوا کې د ډزو او چاودنو غږونو تر څنګ د پلازمېنې کیېف بوریسپیل هوايي ډګر په شاوخوا کې هم د ډزو غږونه اورېدل شوي دي.

له دې مخکې د اوکرایین بهرنیو چارو وزیر روسیه د بشپړې جګړې پر پیلولو تورنه کړه او له ملګرو ملتونو یې وغوښتل 'د مخنیوي لپاره یې هر شونی اقدام وکړي. '

د امریکا ولسمشر جو بایډن وايي، نړیواله ټولنه به له روسیې سره حساب - کتاب وکړي او د سر درانه زیان اوښتو خبرداری یې ورکړی دی.

ښاغلی بایډن به پر پنجشنبه دې لړ کې امریکایاتو ته وینا وکړي، چې روسیه له څه ډول عواقبو سره مخامخېدای شي.

د ناټو سازمان مشر ینس سټولټنبرګ بیا وايي، ناټو په دې سختو شرایطو کې له اوکرایین سره تر څنګ ده او د خپلو متحدینو دفاع لپاره به ټول وس او توان وکاروي.

په اوکرایین کې له ځايي وخت سره سم نیمه شپه د یوې میاشتې لپاره بېړنیز حالت اعلان شو.