چین د افغانستان-تاجکستان پولې ته نږدې د تاجک پولیسو لپاره اډه جوړوي

د تاجکستان یوه جګپوړي چارواکي پنجشنبه وویل، چین ژمنه کړې ده چې د تاجکستان پولیسو لپاره به د افغانستان-تاجکستان پولې ته نږدې یوه اډه جوړوي.

د تاجکستان د پارلمان یوه ویاند د نوم نه ښودلو په شرط ویلي، ولسي جرګې یې وار د مخه د دې اډې جوړېدو ته اجازه ورکړې.

د هغه په وینا، ټاکل شوې ده چې دا اډه بدخشان ته نږدې د تاجکستان په اشکاشم سیمه کې جوړه شي.‌

دې ویاند زیاړه کړې چې د اډې د جوړولو ټول لګښت چین پر غاړه اخیستی او له چمتو کېدو وروسته به د تاجکستان پولیسو ته سپارل کېږي.

د تاجکستان د پارلمان دې ویاند همدا راز ویلي، چین د دې اډې جوړولو لپاره د ۸ نیم میلیونه ډالرو مرسته اعلان کړې ده.

د دې اډې جوړېدل د چین او تاجکستان ترمنځ د پراخېدونکو امنیتي همکاریو څرګندونه کوي.

رپوټونه وایي، بیجنګ له دې مخکې هم د تاجکستان په جنوب ختیځ کې د پولیسو یوه اډه جوړه کړې ده.

دا دواړه هېوادونه په دې اړه اندېښنه لري چې ایا طالبان به افغانستان کې د سخت دریځو ډلو د فعالیت مخنیوی وکړای شي او که نه.

خو بل لور ته د چین د بهرنیو چارو وزارت یوه ویاند په دې تړاو خبریالانو ته ویلي،‌ د دې رپوټونو په اړه مالومات نه لري.

‌

چین د هغو هېوادونو په ډله کې دی چې پر افغانستان د طالبانو له واکمنېدو وروسته هڅه کوي له دې ډلې سره نږدې اړیکې وپالي.

خو بیجنګ په کلکه له طالبانو غواړي چې هغه وسلوال وځپي چې د چین په شینجیانګ ایالت کې له مسلمانو اویغور بیلتون پالو سره خواخوږي لري.

بل لور ته تاجکستان د مرکزي اسیا یوازینی هېواد دی چې له طالبانو سره یې اړیکې نه دي ټینګې کړې او بیا بیا یې ټینګار کړی چې افغانستان کې به د دې ډلې حکومت په رسمیت ونه پېژني.

افغانستان او تاجکستان خپلو کې ۱۳۰۰ کیلومتره ګډه پوله لري او د تاجکستان ولسمشر امام علي رحمان په دې سیمو کې د سخت دریځو ډلو د فعالیت په اړه ندېښنه ښودلې.

د سیمې یو بل ځواکمن هېواد،‌ روسیه، وار د مخه تاجکستان کې لویه پوځي اډه لري او مسکو خبرداری ورکړی چې که د افغانستان له خاورې مرکزي اسیا ته امنیتي ګواښ پېښ شي نو جدي اقدام به کوي.