'د کورونا وېروس چټکې خپرېدا د هند پلازمېنې ډیلي روغتیايي نظام سخت ننګولی'
د عکس سرچینه، Reuters
د هند پلازمېنې ډیلي اعلی وزیر وايي، په هغه چټکۍ سره چې کورونا وبا په دغه ښار کې خپره شوې ده، روغتیايي سیسټم یې سخت ننګولی دی.
اعلی وزیر اروین کجریوال وايي، د جون په لومړیو کې د کوویډ - ۱۹ ناروغانو شمېر ناڅاپي ډېروالی د دې سبب شو، چې په روغتونونو کې د نویو ناروغانو لپاره د ځای موندل ګران شي او د مړینې شمېر لوړ شي.
پلازمېنه ډیلی دا مهال په ټول هند کې د ناروغانو شمېر له پلوه تر بل هر ځای ډېره ځپل شوې سیمه ده.
په دغه ښار کې د کورونا وېروس نژدې ۷۳ زره ناروغان دي او له همدې کبله ۲۵۰۰ کسان مړه شوي دي.
خو بل لور ته د هند لومړی وزیر نرېندرا مودي وايي:
''له کوویډ - ۱۹ سره د مبارزې لړ کې هند د ډېرو نورو هېوادونو پرتله مناسب وضعیت کې دی. ''
نوموړي په یوه ویډیويي پیغام کې وویل، دا مبارزه د هغو سختو قرنطین بندیزونو له کبله بریالۍ شوه چې په مارچ میاشت کې خلکو عملي کړل. هغه زیاته کړه:
''په هند کې له دغې ناروغۍ د رغېدنې کچه په لوړېدو ده. ''
د عکس سرچینه، Reuters
بل لور ته د هند تامل ناډو ایالت کې د پولیسو په توقیف کې د یوه پلار او زوی له مړینې وروسته په ولس کې سخت غم او غوسه پاریدلي.
۵۸ کلن پي، جیاراج او زوی یې ۳۸ کلن فینیکس د کورونا وېروس مخنیوي قرنطین پر مهال تر ناوخته پورې د دکان پرانیستلو له کبله ځايي پولیسو نیولي وو.
په تامل ناډو ایالت کې دکانونو ته تر یوه معلوم وخته پورې د پرانیستل کېدو اجازه ورکول کېږي.
پلار او زوی له نیول کېدو وروسته کرۍ شپه په توقیف کې ساتل شوي وو او له خوشي کېدو دوې ورځې وروسته څو ساعته تر منځ یو په بل پسې مړه شول.
د عکس سرچینه، Getty Images
د دوی خپلوان ادعا کوي چې پولیسو په توقیف کې پلار او زوی دواړه سخت وهلي ټکولي وو.
د دوی له مړینې وروسته ځای خلکو د پولیسو پر ضد احتجاج وکړ او د پېښې څېړنې غوښتنه یې کوله.
په ایالت کې د اپوزیسیون ګوندونو پارلمان غړي هم د احتجاج لپاره سړکونو ته ووتل.
د ځايي سوداګرو ټولنو پېښه وغندله او ځايي محکمې د پېښې ارزونې امر وکړ.
هغه پولیس افسران چې دغه زوی - پلار یې نیولي وو، تبدیل شوي او ایالتي حکومت د مړو کسانو کورنۍ لپاره یو میلیون روپۍ تاوان ورکړی.
دغې پېښې لومړی په ځايي کچه او وروسته د ټول هېواد په کچه په خواله رسنیو کې هم پراخ غبرګونونه موندلي.
