داسې عادتونه چې تر یوې لسیزې مو له خطرناکو ناروغیو ساتلای شي

په یوه نوې څېړنه کې ویل شوي که په مناسب انداز ژوند وشي، نو ښځې ۱۰ کاله او نارینه تر اووه کاله پورې اضافي ژوند ځان د سرطان، زړه ناروغیو او شکرې له دویم ډوله ناروغیو ژغورلای شي.

څېړنه وايي، د دې لپاره باید ورزش په خپل معمول کې شامل شي، په څښاک کې اعتدال وشي، وزن مناسب وساتل شي او د تمباکو له استعماله ډډه وشي.

امریکايي څېړونکو د دې لپاره تر ۲۰ کلونو پورې د ۱۱۰ زره کسانو د ژوند څرنګوالی او روغتیا څارلي دي.

په بوسټن کې د هارورډ پوهنتون عامې روغتیا څانګې پروفیسر ډاکټر فرنک هو، چې د دغې څېړونکې ډلې مشر دی وايي:

''څېړنې خلکو ته مثبت پیغام درلود. د دوی ژوند نه یوازې یو څو کاله اوږدیږېدای شي، بلکې په مناسب انداز د ژوند له تېرولو سره یې د ژوند دغه کلونه 'له ښې روغتیا سره ' ښه تېريږي. ''

هغه ښځې چې وايي، له توصیه شویو پنځو کټګوریو یې څلور پوره کړې وايي، په اوسط ډول یې ۳۴ کاله له سرطان، زړه ناروغیو (لکه د زړه دریدل یا سکته) او شکرې له دویم ډول پرته ژوند کړی، چې د هغو ښځو پرتله لس کاله زیاتوالي ښيي چې دغه شرایط یې نه دي پوره کړي.

د روغو نارینه وو لپاره دا اوسط ۳۱ کاله وو چې د ناروغو نارینه وو پرتله اووه کاله احتمالي زیاتوالی ښي.

ولې د ښځو او نارینه وو تر منځ توپیر؟

دا ښايي ځکه وي، چې ویل کېږي په اوسط ډول تر نارینه وو د ښځو عمر ډېر وي. سرطان، د زړه اړوند ناروغۍ او د شکرې دویم ډول هغه ناروغۍ دي چې معمولاً له پاخه عمر سره تړاو ورکول کېږي او دغه راز د انسانانو ژوند تېرولو په څرنګوالي پورې هم نژدې تړاو لري.

د بېلګې په توګه چاغښت یا له کچې زیات وزن ته د سرطان له ۱۳ ډولونو سره تړاو ورکول کېږي، چې د مثانې، تیونو، پښتورګو، سږي او د خوراک غاړې له سرطانونو سره تړاو ورکول کېږي.

برتانیا کې د سرطانونو په تړاو څېړنیزه اداره کینسر ریسرچ یو کي مسوولین وايي، که خلک د ژوند تېرولو په انداز کې بدلون راولي، ناپروسس شوې غوښې خوراک کم کړي، په خوړو کې د فایبر کاروول ډېر کړي او له مخامخ لمره د بدن پوټکی وساتي، له۱۰ د څلور ډوله سرطانونو مخه نیول کېدای شي.

دا یوه خورا پراخه مشاهداتي څېړنه وه، ځکه یې له مخې نه شي ویل کېدای چې د ژوند تېرولو همدا انداز د بې ناروغۍ اضافي ژوند مستقیم لامل دی.

په دې کې هڅه شوې، چې د کورنۍ طبي شالید، توکمیز تړاو او عمر په څېر عنصرونه هم په پام کې ونیول شي.

په څېړنه کې د خلکو د خوړو، ونې، ورزش او وزن په هکله هغه معلومات شامل دي چې خلکو ورکړي او دا تل کره نه شي بلل کېدای.

د څېړنې برخه والو لوی اکثریت ( ۷۳ زره ښځې او ۳۸ زره نارینه) سپین پوټکي روغتیا پالان وو.