هندۍ ناوې "د تور رنګ له پېغوره" ځان وژلی

هندي پولیس وايي، یوې ۲۱ کلنې ښځې ځکه ځان وژلی چې مېړه یې پرلپسې د تور رنګ پېغور ورکاوه. وروسته د ښځې پلار پولیسو ته عریضه کړې چې زوم یې د لور د مړینې سبب دی او راجستان ایالت پولیسو قضیه ثبت کړې ده.

پولیسو بي بي سي هندي څانګې ته ویلي، تر اوسه یې څوک نیولي نه دي او د مړې شوې ښځې مېړه د پېښې په تړاو تر اوسه څه نه دي ویلي.

په هند کې معمولاً ډېر خلک سپین یا غنم رنګی پوست د سکاڼ یا تور رنګ پرتله د ښکلا معتبره نښه بولي.

د دغې ښځې پلار پولیسو ته ویلي، زوم یې (پرلپسې لور ته د توربخون رنګ له کبله پېغورونه ورکول او ځوروله یې) چې له کبله یې هغې په ناهیلۍ کې ځان وژلی.

دا لومړی ځل نه دي چې د پوستکي رنګ پېغورونو له کبله ښځې ځانوژنه کوي. پولیس وايي، ۲۰۱۴ کال کې هم یوې ښځې د پوستکي رنګ په اړه د مېړه د پېغورونو له کبله ځان وژلی و.

دغه راز په ۲۰۱۸ کال کې یوې ۱۴ کلنې زده کونکې د ټولګیوالو له هغو پېغورونو له اورېدو وروسته ځانوژنه کړې وه، چې ورته ویلي یې و 'رنګ دې تور دی، ځکه بدرنګه یې '

د بي بي سي ګیتا پانډې وايي، په هند کې ډېرې هغه نجونې چې د پوستکي رنګ یې صاف نه وي، له ماشومتوبه په ناوړه نومونو یادېږي.

په ښوونځیو، لوبغالو او ان کورونو کې پېغورونه ورکول کېږي او د هغو خپلوانو پرتله چې رنګونه یې سپین وي، بې اهمیته بللې کېږي.

کله چې د واده خبره کېږي، ناوې تل سره - سپینه یا غنم رنګې یادېږي، خو توربخونه هېڅکله هم نه یادېږي.

ځايي مهمې رسنۍ هم دغه تصور د مشهورو ممثلو یا ماډل نجونو د تصویرونو په خپرولو سره تازه کوي. دغه ډول پېغورونه د دې لامل کېږي چې د سکڼي رنګ لرونکې نجونې د 'بدرنګۍ ' له احساس سره عمر تېروي.