تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
لاهور کې د صوفیانو زیارت ته څېرمه چاودنه شوې
پاکستاني سیمه ییزې رسنۍ وايي، د لاهور ښار صوفيانو یوه لوی داتا زیارت ته څېرمه چاودنه شوې، چې لږترلږه اته کسان پکې وژل شوي دي.
چارواکي وايي، ښکاري چې د برید موخه د پولیسو یو موټر وي.
پولیس وايي، په چاودنه کې د پولیسو په ګډون ۵ کسان هم ټپیان شوي.
تر اوسه د یوه پولیس او یوه ولسي وګړي وژل کېدل تایید شوي.
چاودنه د صوفیانو داتا دربار زیارت ته څېرمه شوې، چې سوېلي اسیا کې د صوفیانو تر ټولو لوی زیارت دی.
د لاهور ددغه برید مسوولیت له پاکستاني طالبانو سره نژدې يوې ډلې "حزب الاحرار" منلی دی.
په سیمه کې د چاودنې ځای ته څېرمه عملیات هم روان وو او سیمې ته ډېر پولیس استول شوي دي.
د پاکستان رادیو ویلي، لومړي وزیر عمران خان په سختو ټکو دا برید غندلی او له اړوندو چارواکو یې غوښتي چې ټپیانو ته د درملنې لپاره پوره اسانتیاوې برابرې کړي.
د صوفیانو داتا په نامه دربار د پاکستان دویم لوی ښار لاهور کې پروت دی، چې هر کال سلګونه زره زیارت کوونکي ورځي.
په ۲۰۱۴ کال د خیبر پښتونخوا پېښور کې پر یوه ښوونځي د طالبانو له هغه برید وروسته چې لږترلږه ۱۴۱ کسان یې ووژل، پاکستان له ترهګرۍ سره د مبارزې چاره ګړندۍ کړې او د یاد برید په تړاو یې ځینې کسان اعدام هم کړل.
په ۲۰۱۶ کال لاهور کې د مسیحیانو پر یوه مذهبي غونډه برید وشو، چې لږترلږه ۷۲ کسان یې ووژل.
د ۲۰۱۰ کال جولای میاشت کې د دغه زیارت انګړ ته یو ځانمرګی بریدګر ننوتی و چې هلته یې لږترلږه ۴۲ کسان ووژل او ۱۷۵ نور یې ټپیان کړل.
