تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د امریکا ټاکنې؛ د ډونلډ ټرمپ مخالف ګوند د ولسي جرګې واک خپل کړ
د امریکا دکانګرس ټاکنو لومړنۍ پایلې ښيي، چې د استازو جرګې ډېری څوکۍ د دېموکراتانو ګټلې او دې سره به سپینه ماڼۍ له دې وروسته د خپلو پروګرامونو پرمخ بېولو کې له خنډونو سره مخ شي.
خو جمهوریپال ولسمشر ډونلډ ټرمپ په ټوېټر کې د خپل ګوند هڅې لوی بری بللی او له رایه ور کوونکو یې مننه کړې ده.
ښايي د ولسمشر ټرمپ اشاره په سنا مجلس کې د خپل ګوند د اکثریت څوکیو لا پیاوړتیا او همدارنګه د ځینې ایالتونو د والیاتو ځینې ټاکنو کې بري ته وي.
په سنا کې ۵۱ څوکۍ جمهوریپالو او ۴۵ څوکۍ ډیموکراټانو ګټلې دي، خو تراوسه ۲ څوکۍ مالومې نه دي.
ولسي جرګه کې ډیموکراټانو ۱۹۳ څوکۍ او جمهوریپالو ۲۲۰ څوکۍ ګټې دي.
د خینو څوکیو پایله لا هم مالومه نه ده.
د رسنیو اټکل
اعلان شویو پایلو ته په پام ډېری امریکايي رسنۍ وايي، چې د مشرانو جرګې ډېری څوکۍ به د جمهوریپالو په لاس کې پاتې شي او په دې جرګه کې به خپل ځواک نور هم پیاوړی کړي.
امریکايي رسنۍ اټکلوي چې ډیموکراټان به د ولسي جرګې کنټرول په لاس کې واخلي.
د سې شنبې ورځې ټاکنو کې د امریکا د استازو جرګې ټولو ۴۳۵ څوکیو ته ټاکنې کېږي.
د مشرانو جرګې یا سنا یو پر درې برخې یا ۳۵ څوکیو لپاره هم ټاکنې روانې دي.
د ډیموکراټانو هڅې
تراوسه د ولسي او مشرانو جرګو واک د جمهوريپالو په لاس کې و.
دوی د ډونلډ ټرمپ په مشرۍ د سپينې ماڼۍ واک هم لري.
دې ډلې مشرانو جرګه کې د یوې بلې څوکۍ په ګټلو سره خپل ځواک زیات کړه.
ډیموکراټانو اوسنیو ټاکنو کې د ۲۳ زیاتو څوکیو ګټلو سره د خپل هېواد د حاکمیت یوه برخه ترلاس کولی شي.
له دې وروسته دوی د ډونلډ ټرمپ په مشرۍ د سپینې ماڼۍ د راتلونکو پلانونو په مخ کې خنډ اچولی شي.
دوی تېر اته کلونه لږکي و او جمهوریپالو د مشرانو او ولسي جرګو ډېری څوکۍ په خپل واک کې درلودې.
دوه مسلمان نوماندان
په دې ټاکنو کې تراوسه سوماليايي توکمه الهان عمر د امریکا مینه سوټا او فلسطیني توکمه رشیده طیب په مشیګان ایالت کې د ډېرو رایو ګټلو سره د امریکا ولسي جرګې ته لار وکړه.
سومالي توکمه کډواله په مینه سوټا ایالت کې پام وړ ډېر دي او اوس واشنګټن کې خپل استازی لرلی شي.
د مشیګان دیربورن ښار کې نیم میلیون مسلمانان اوسي او د امریکا د مسلمانانو پلازمېنه بلل کېږي.
