تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
روسیې په سوریه کې پر ملکي خلکو بمبار رد کړ
روسیې هغه ادعاوې رد کړې چې ګویا د یکشنبې په ورځ یې ځواکونو د سوریې په ختیځ کې یو کلی بمبار کړی او لسګونه ملکي کسان یې وژلي دي.
په برتانیا کې مېشت د سوریې د بشر حقونو د څار کمېسیون یوه ورځ وړاندې ویلي وو، هوايي ګوزارونو په الشفاه کلي کې ۵۳ ملکیان وژلي، خو د دیرالزور۲۴ ویبپاڼې بیا د وژل شویو شمېر ۲۵ ښودلی دی.
دواړو سرچینو ویلي، بمبار د روسیې اړوند الوتکو له خوا ،چې د داعش پر وړاندې د بشار اسد له ځواکونو ملاتړ کوي، تر سره شوی دی.
خو د روسیې د دفاع وزیر د دوشنبې په ورځ په ټینګار وویل، د سوریې په الشفا کلي دوی بمبار نه دی کړی.
د روسیې د دفاع وزارت په خبر پاڼه کې راغلي، هوايي ځواکونه یې په سوریه کې د هستوګنې له ځایونو لرې پر هغو هدفونو ګوزارونه کوي، چې د نړیوالو ترهګریزو ډلو اړوند وي.
خو د روسیې د دفاع وزارت تر دې وړاندې ویلي و، د هوايي ځواکونو اړوندو ۶ بم غورځوونکو الوتکو یې د یکشنبې په ورځ په دیرالزور ولایت کې د داعش پر مورچلو ګوزارونه کړي دي.
د الشفا کلی له عراق سره په ۱۴ کیلومترۍ کې په دیرالزور ولایت کې دی.
دیرالزوز ۲۴ ویبپاڼې چې د سوري فعالانو اړوند ده، لیکلي، د یکشنبې پهه ورځ روسي الوتکو په دیرالزور په الشفا کلي کې څو کورونه بمبار کړل چې بې ځایه شوې کورنۍ پکې اوسېدې.
د سرچینې په خبره، وژل شوي ماشومان او ښځې دي او شونې د مرګژوبلې کچه ډېره شي، ځکه ډېر شمېر کسان تر نړیډلو دېوالونو لاندې دي.
د سوریې د بشر حقونو د څار بنسټ هم ویلي، روسي الوتکو د ملکي خلکو پر هستوګنځیونو بمبار کړی، لسګونه ملکيان یې وژلي چې په ډله کې یې ۲۱ ماشومان هم شته.
