تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
هند کې د جنسي تېري ۱۰ کلنې زیانمنې اولاد وزېږېد
په هند کې د یوې لس کلنې نجلۍ چې جنسي تېری پرې شوی و او تېره میاشت د هند سترې محکمې یې د اولاد ضایع کولو غوښتنه رد کړې وه، لور پیدا شوې ده.
نجلۍ لا خبره نه ده چې ماشوم یې زېږولی دی. د میندوارۍ پر مهال ورته ویل شوي ول چې په نس کې یې د یوې ډبرې شتون د پړسوب لامل و.
د ماشومې وزن دوه نیم کیلوګرامه دی او د مور د ګېډې په څیرلو زېږېدلې ده.
یوه چارواکي بي بي سي ته وویل چې د مور او ماشوم روغتیايي وضعیت ښه دی.
نجلۍ ادعا کوي چې په تېرو اووه میاشتو کې د خپل تره له خوا چې اوس بندی دی، څوڅو ځلې جنسي تېری پرې شوی و.
د نجلۍ د میندوارۍ مسله نژدې یوه میاشت وړاندې راپورته شوې وه چې د نس له درده یې شکایت کول پیل کړ او مور او پلار بیا یې روغتون ته بوتله.
تېره میاشت سترې محکمې د ماشوم د ضایع کولو اجازه ورنه کړه ځکه د ډاکترانو په وینا د هغې پر میندوارۍ ۳۲ اوونۍ تېرې شوې وې چې دا د ډاکترانو په نظر ډېره موده ده او د میندوارۍ له منیځه وړل ډېر لوی خطر لري.
یوې وړې محکمې هم تر دې وړاندې ورته غوښتنه پر همدې دلایلو رد کړې وه.
