" پاکستان ته د امریکا د ولسمشر ډونلډ ټرمپ د صبر کاسه ډکه شوې"

پاکستان ټوډې:

پاکستان ټوډې ورځپاڼې د اسیا مرکز د مرستیال مشر هغه څرګندونې را اخیستې چې وايي داسې ښکاري چې د طالبانو او حقاني شبکې د ملاتړ له امله پاکستان ته د امریکا د ولسمشر ډونلډ ټرمپ د صبر کاسه ډکه شوې ده.

ډاکټر مسعود یوسف په اسلام اباد کې د امریکا او پاکستان اړیکو په اړه یوې غونډې ته وینا کې ویلي له امریکا سره د پاکستان اړیکي هغه وخت عادي کیدای شي چې له امریکا سره د افغانستان په ټیکاو کې مرسته وکړي.

ده ویلي د همدې لپاره پاکستان ته پکار ده چې د طالبانو او حقانې ډلې په وړاندې کوټلي ګامونه پورته کړي.

ایر فورس ټایمز:

امریکايي خپرونه ایر فورس ټایمز لیکي چې امریکا د سمندري ځواکونو سل تازه دم سرتیري افغانستان ته استوي.

دغه خپرونه زیاتوي دا سرتیري به د افغانستان نارام ولایت هلمند کې ځای پر ځای شي.

خپرونه په افغانستان کې د غوڅ ملاتړ ماموریت د ویاند له قوله لیکي دغه سرتیري به د یوې لنډې مودې لپاره هلمند ته واستول شي، چې د ده په وینا هلته له میشتو سرتیرو سره مرسته وکړي.

هندوستان ټایمز:

هندوستان ټایمز ورځپاڼې په افغانستان کې د نشه یي توکو د کاروبار او له دې لارې د طالبانو د مالي عایداتو په اړه یو مطلب خپور کړی.

په دغه راپور کې چې فرانس پرس خبري اژانس جوړ کړی ویل شوي چې طالبان په افغانستان کې د هیروینو پر تولید کنټرول لري.

په راپور کې د ملګرو ملتونو د نشه یي توکو او جرمونو د مخنیوي د ادارې په حواله ویل شوي چې طالبانو تیر کال د شاوخوا نیمايي عاید د اپینو د کار له لارې ترلاسه کړی.

په راپور کې ویل شوي چې امریکا له ۲۰۰۲ کال راهیسې په افغانستان کې د نشه یي توکو د مخنیوي په برخه کې اته اعشاریه شپږ ملیارد ډالره لګولي خو بیا هم د افغانستان هیرویین تر شمالي امریکا رسیږي.

ګارډین:

ګارډین ورځپاڼې د پاکستاني طالبانو د هغې مجلې په اړه یو مطلب خپور کړی چې د ښځو لپاره یې ځانګړې کړې ده.

په راپور کې ویل شوي چې په مجله کې د دغې ډلې د مشر فضل الله خراساني د میرمنې مرکه خپره شوې، هغې ویلي نجونې باید ژر واده کړل شي ځکه که د دې په وینا داسې ونه شي نو اخلاقي فساد خوریږي.

د مجلې په سرمقاله کې ښځې هڅول شوې چې د دوی په وینا د مجاهدینو له لیکو سره یو ځای شي.

د دغې مجلې په اړه په امریکا کې د ووډراو ویلسون مرکز یوه غړي مایکل کوګلمان ګارډین ته ویلي دا د جګړې په ډګر کې د طالبانو له ناکامیو وروسته د دغې ډلې یوه هڅه ده چې خپل نفوذ پراخ کړي.

دی وايي طالبان ځکه ښځې هڅوي چې دوی پر خپلو اولادونو ډیر اغیز لرلی شي.