کمپیوټري ستونزه: لندن کې د برټش ایرویز ټولې الوتنې لغو شوې
د عکس سرچینه، .
د برتانیا 'برټش ایرویز ' هوايي شرکت، د کمپیوټري تخنیکي ستونزې له کبله د لندن له دوو لویو هوايي ډګرونو ټولې الوتنې لغو کړې دي. د هوايي شرکت چارواکو ویلي:
''د کمپیوټري سیسټم یوې لویې ستونزې د نړۍ لر او بر کې زموږ الوتنې له خنډ او ځنډ سره مخامخ کړې دي. ''
د عکس سرچینه، @TIMREIDCE
شرکت له مساپرو بښنه غوښتې او وايي، هڅه کوي ژر تر ژره دغه ستونزه هواره کړي. د لندن هېتهرو هوايي ډګر چارواکو هم ویلي، له شرکت سره په ګډه د ستونزې هوارولو کوښښ کوي.
بي بي سي سره خبرو کې د برټش ایرویز چارواکو ویلي، 'دم ګړۍ داسې کوم ثبوت نه شته، چې ګواکې دغه تخنیکي ستونزه د انټرنېټي برید له کبله رامنځته شوې وي. '
هوايي شرکت له خپلو ټولو مساپرو غوښتي و، چې د شنبې ماښام له شپږو بجو مخکې هېتهرو او ګېټویک هوايي ډګرونو ته ورنه شي، ځکه په وینا یې هلته 'خورا ګڼه ګوڼه ده ' خو وروسته یې د ټولو الوتنو لغو کولو اعلان وکړ.
له دغو هوايي ډګرونو د نورو شرکتونو الوتنې نه دي اغېزمن شوې.
د عکس سرچینه، @THEBOYG
یوه خبریال مارټین کینټ ویلي، تر یوه نیم ساعته په الوتکه کې ایسار پاتې و، ځکه په وینا یې د کمپیوټري سیسټم ورانۍ له کبله د الوتکې دروازې نه پرانیستل کېدې.
د روم، پراګ او میلان په ګډون له یو شمېر نورو ښارونو هم د دغه شرکت الوتکو په تګ راتګ کې د خنډ او ځنډ رپوټونه ورکړل شوي.
