روسي دیپلوماتان د امریکا له خاورې ووتل
د عکس سرچینه، AFP
د نوي زیږدیز کال له لومړۍ ورځې سره سم، پنځه دېرش روسي دیپلوماتان له خپلو کورنیو سره د امریکا له خاورې ووتل. دوی د امریکا د ولسمشر بارک اوباما په امر وتلي دي.
دغه دیپلوماتان د امریکا د ولسمشر بارک اوباما له هغه غبرګون وروسته وتلي، چې سپینې ماڼۍ د دیموکرات ګوند او هیلیري کلنټن د برېښنالیکونو هک کولو کې مسکو په لاس لرلو تورن کړ.
د امریکا ولسمشر ویلي؛ د امریکا استخباراتي سازمانونو موندنې ښيي چې روسیه امریکا کې د سږکال نومبر ټاکنو په درشل کې د ډیموکرات ګوند د ایمیلونو هک کولو مسوول دی.
د یکشنبې په ورځ (د جنورۍ لومړۍ/جدي ۱۲) د روسیې د سفارت یوه چارواکي ومنله چې پنځه اویا دیپلوماتان له خپلو کورنیو سره یوځای په یوه روسۍ الوتکه کې د امریکا له خاورې ووتل.
د عکس سرچینه، EPA
پر همدې مهال، د روسیې ولسمشر ولادیمیر پوتین ویلي نه غواړي "په یوه نامسؤولانه دیپلوماتیک عمل کې ځان ښکېل کړي"، او غوره ګڼي چې د مسکو او واشنګټن ترمنځ د ترینګلیو اړیکو د رغونې لپاره د ډونلډ ټرمپ تر ولسمشر کېدا پورې صبر وکړي.
د ښاغلي پوتین دا پرېکړه د ښاغلي ټرمپ له خوا ستایل شوې او دا یوه "ډېره هوښیارانه" ارزونه بلل شوې.
ټرمپ په پیل کې د امریکا د امنیتي او څارګرو بنسټونو او سي آی اې په تړاو د رپوټونو په اړه شک ښودلی و. نوموړي د نوي کال د مېلمستیا پرمهال خبریالانو ته وویل، دی پر هغه څه پوهېږي چې "نور خلک ترې بې خبره دي."
ده د خبریالانو دې پوښتنو ته په ځواب کې وویل، دغه معلومات به د روانې اونۍ په سې شنبې یا چارشنبې ورځې خپاره کړي:
"زه پوهېږم چې هک کول څه معنا لري او پوهېږم دا ګرانه ده چې رښتیا هم وپوهېږئ تر شا یې څوک دي."
د امریکا منتخب ولسمشر ډونلډ ټرمپ، چې تر راتلونکو درو اونیو (د جنورۍ تر ۲۰) پورې سپینې ماڼۍ ته ورسېږي، ویلي د پټو رازونو د ساتنې د خوندیتوب لپاره باید پر کمپیوټر باور ونه کړل شي:
"که مهم شی وي، باید په کاغذ لیکل شوي وای؛ ځکه چې هېڅ کمپیوټر خوندي نه دی".
د عکس سرچینه، AP
د عکس سرچینه، AFP
