ای پي ایل؛ افغان لوبغاړی 'رحمان الله ګوربز' ګجرات ټایټنز لوبډلې واخیست

د افغانستان د کرېکټ ملي لوبډلې غړی رحمان الله ګوربز د هند کرېکټ غوره لیګ "ای پي ایل" سږنیو سیالیو کې لوبېږي.

شل کلن ګوربز د افغانستان ملي لوبډله کې د پیل توپوهونکی او وېکټ ساتونکی دی.

هغه به د ۲۰۲۲ کال د "ای پي ایل" سالیو کې د ګجرات ټایټنز لوبډلې برخه وي.

دوه نور افغان لوبغاړي راشد خان او نور احمد لکڼوال هم سږ کال 'ای پي ایل' کې همدې لوبډلې ته لوبه کوي.

ګجرات ټیټانز هم د لکناو لوبډلې په څېر سږ کال په لومړي ځل ای پي اېل کې لوبېږي.

ګوربز پر خپله فېسبوک پاڼه لیکلي: "زه به تر خپل وس کوښښ وکړم چې په ښه پرفامنس کولو سره تاسو خوښ وساتم او د خپل هیواد نوم روښانه کړم."

د رحمان الله ګوربز نوم تېره فبرورۍ د ای پي ایل بولۍ کې و، خو کومې لوبډلې نه و اخیستی.

ګجرات ټایټنز لوبډلې هم د خپل ټویټر پر پاڼه رحمان الله ګوربز ته هرکلی ویلی دی.

د رپوټونو له مخې ښاغلی ګربز د انګلنډ د پیل توهوهونکي جاسون رای پر ځای اخیستل شوی دی.

رای تېره میاشت وویل یو څه موده کرېکټ نه کوي.

ګجرات ټایټنز لوبډلې استرالیايی 'ماتیو وېډ' هم د وېکټ ساتونکي او د پیل توپوهونکي په توګه اخیستی دی.

رحمان الله ګوربز له ای پیل وړاندې د پاکستان، بنګله دېش، سریلانکا په غوره لګونو کې لوبېدلی او ښه ځلېدلی دی.

د ۲۰۲۲ کال د ای پي ایل سیالیو کې د کجرات ټیټانز لوبډلې مشري هاردیک پانډیا کوي.

ټاکلې چې دغه لوبډله د مارچ له ۱۳مې د احمد اباد ښار په نرېندرا مودي لوبغالي کې د چمتووالی لړۍ پیل کړې.

دا لوبډله به د مارچ پر ۲۸مه د لکناو سوپر جاینټ خلاف خپله لومړۍ لوبه وکړي.