هندۍ پهلوانه د لوبې ډګر ته په دودیزو کالیو کې وتلې

هند او د نړۍ په لر او بر کې د پهلوانۍ لوبې مینه وال هغه مهال حیران شول، چې د هند هریانا ایالت اوسېدونکې پهلوانه کویتا دیوي د ډبلیو، ډبلیو اي سیالیو ډګر ته په دودیزو کالیو کې ووته.

پر انټرنېټ د نوموړې هغې لوبې ویډیو پنځو ورځو کې ۳۵ سوه زره خلکو لیدلې، چې د نیوزلنډ له پهلوانې ډکوټا کايي سره په دودیزو کالیو کې پهلواني کوي.

مېرمن کویتا لومړۍ هندۍ پهلوانه ده، چې ډبلیو، ډبلیو اي سیالیو ته لار مومي.

هندۍ پېغله د باډي بیلډرۍ نړیواله اتله شوه

د حجاب شرط له کبله د هندۍ لوبغاړې نوم له سیالیو بهر

خو دا ډېرو لږو کسانو ته معلومه ده، چې پهلوانې کویتا یو مهال د ځانوژنې هڅه کړې.

نوموړې بي بي سي سره خبرو کې ویلي، یو مهال یې ماشوم د اتو میاشتو و، کورنۍ یې هم ورسره همکاري نه کوله:

'له لوبې مې هم زړه تور شو، ژوند راته یو دروند بار ښکارېده، ساه اخیستل راته ګران شوي وو ''

هغه وايي ' هغه مهال چمتو وم، چې د ټول عمر ارمان هېر کړم. ۲۰۱۳ کال کې دومره خواشینې وم، چې د ځانوژنې هڅه مې وکړه، هغه مهال رانه خپل ماشوم هم هېر شوی و '

نوموړې وايي، هغه مهال یې مېړه نه غوښتل دا لوبه وکړي، چې په وینا یې ښايي د کور مسوولیتونه یې خنډ بلل، خو وايي، اوس هغه پرې ویاړي او مرسته ورسره کوي.

کویتا دیوي وايي، ځکه یې په دودیزو کالیو کې پهلواني وکړه، چې غواړي د خپل هېواد کلتور خلکو ته وښيي او دا چې په وینا خلک باید پوه شي، چې کالي د لوبې پر وړاندې خنډ نه دی.

کویتا د هند په کچه او په نړیوال ډګر کې یو شمېر جایزې ګټلې دي.

نوموړې وايي، له خپل ورور سنجې دلال مننه کوي، چې د پهلوانۍ ځینو مهمو مرکزونو کې یې د زده کړې لړ کې ورسره مرسته کړې. اوسمهال بهرني روزونکي کویتا دیوي روزي. نوموړې وايي:

'' د یوې نجلۍ لپاره د لوبو تر ډګره سفر اسانه چاره نه ده، لومړي سر کې خو زموږ ټولنه کې له کوره د نجونو وتل هم اسان نه دي ''