ملاله یوسفزۍ: بختوره یم چې مېړه مې زما په ارزښتونو پوهېږي
نوبل جایزه ګټونکې ملاله یوسفزۍ وایي، ځان ځکه "بختوره" بولي چې داسې سړي سره یې نکاح کړې، چې د دې په ارزښتونو پوهېږي.
نوموړې له عصر ملک سره خپله نکاح اعلان کړه، خو له بي بي سي سره د واده په تړاو پر هغو ''اندېښنو '' غږېدلې چې مخکې یې له برټش ووګ مجلې سره مرکه کې څرګندې کړې وې.
د بي بي سي اندریو مار خپرونه کې د ښځو او نجونو حقونو ۲۴ کلنې فعالې ملالې یوسفزۍ وویل، د واده په تړاو یې د نړۍ ډېرو هغو نجونو په هکله اندېښنې پر ځای وې، "چې د ماشومتوب واده او طلاقونو... او واک ناسم وېش یې ژوند سخت کړی".
ملالې يوسفزۍ تېره اوونۍ یوه ټویټر پیغام کې وویل، د بريتانيا برمنګم ښار کې په خپل کور کې يې د نکاح مراسم ترسره کړي او له خلکو يې د راتلونکي ژوندانه په اړه د دعاګانو غوښتنه وکړه.
د نوموړي د مېړه عصر ملک په اړه ويل کېږی چې د پاکستان لاهور ښار کې يې لوړې زدکړې کړې دي، او پاکستان کرېکټ بورډ 'پي سي بي ' کې د عالي فعالیت برخې عمومي مشر دی.
ملالې يوسفزۍ له افغان طالبانو وغوښتل کې چې سملاسي نجونو ته د بشړو زدکړو اجازه ورکړي او پر نړيوالو مشرانو يې غږ وکړ چې په افغانستان کې د نجونو حقونه خوندي کړي.
ملاله یوسفزۍ په ۲۰۱۲ کال کې د خیبر پښتونخوا په سوات کې له یوه برید وروسته د درملنې لپاره بریتانیا ته ولېږدول شوه او له هغه راهیسې دې هېواد کې له کورنۍ سره مېشت ده.
نوموړې په ۲۰۱۴ کال کې د نجونو د تعلیم لپاره د خپلو هلو ځلو له کبله د سولې د نوبل جایزې تر ټولو کم عمره ګټونکې شوه.
