د خوشالۍ مراسمو ته بلل شوې سندرغاړې هوايي ډزو ووژله
د عکس سرچینه، Sindh Police
د پاکستان په سیند ایالت کې پولیس وايي، د یو ماشوم د ختنې یا سنتولو مراسمو کې د ډزو له امله یوه ځايي سندرغارې ثمینه سیندو وژل شوې ده.
د لړکانا د پولیسو مشر وايي پېښه د چهارشنبې په شپه په کنګنا کلي کې شوې ده.
تنویر تنیو زیاتوي، د سنتګرۍ مراسمو ته دا سندرغاړې بلل شوې وه:
" له سندرو سره هوايي ډزې هم کېدلې په دغه وخت یوه ګولۍ پر ثمینه سیندو هم لګېږي او وژل کېږي".
د عکس سرچینه، Getty Images
ځايي چارواکي وايي، پولیسو ډزې کوونکی نیولی او له هغه یې یوه توپانچه هم ترلاسه کړې ده.
پر پاکستان سربېره افغانستان کې هم د واده، لوبو ګټلو او خوشالۍ نورو مراسمو کې د ډزو له امله خلک وژل کېږي.
