مشال وژنه: "د دین سپکاوی د وژونکو یوه پلمه وه"

د پاکستان تحریک انصاف ګوند مشر عمران خان ویلي، د مردان عبدالولي خان پوهنتون د محصل مشال خان په وژنه کې دین ته د سپکاوي کولو خبره د یوې پلمې په توګه کاروول شوې ده. عمران خان د سې شنبې پر ورځ صوابۍ سیمه کې د مشال خان له کورنۍ سره لیدلي دي.

نوموړي له دغې لیدنې وروسته رسنیو ته ویلي، هر هغه کس ته به سزا ورکړل شي، چې دغه وژنه کې لاس لري.

ملالې یوسفزۍ د مشال خان وژنه ترهګریز عمل وباله

د پاکستان لومړي وزير نواز شريف د مشال خان وژنه غندلې

د عمران خان په خبره، 'د وژونکو هدفونه نور وو، خو هغوی د دین سپکاوی یوازې یوه پلمه نیولې وه. '

نوموړي ویلي، هغسې زور زیاتی، چې له مشال خان سره شوی، ځناور هم دغه ډول ظلم نه کوي.

عمران خان ویلي، وژونکي که د هر سیاسي ګوند اړوند وي، د خپل عمل سزا به وویني. عمران خان زیاته کړې، د پاکستان ټول سیاسي او مذهبي ګوندونه په دې اړه یوه خوله دي، چې باید د مشال خان وژونکي د خپلې کړنې سزا وویني.

عمران خان د مشال وژنې قضیه کې د پولیسو څېړنه او رول ستایلي دی.

د مشال خان له مور او پلار سره له لیدو ورسته عمران خان په یوه ټویټر پیغام کې لیکلي، د مشال خان کورنۍ ترې غوښتنه کړې، چې د یادګار په توګه د هغه په نامه کړي، چې د عمران خان په وینا خورا مناسبه غوښتنه ده.

بل لور ته یوه نوی ویډیويي کلیپ خپور شوی، چې په کې د مشال خان وژونکي د هغه له وژنې وروسته یوه بل ته مبارکي وايي او لوړه کوي، چې د وژونکي نوم به نه برالا کوي.

دغه ویډیويي کلیپ پر خواله رسنیو خپور شوی او په کې عارف نومی کس خپل او د پلار نوم یادوي او وايي که څوک د مشال خان وژنه کې پولیس ته رپوټ ورکوي، د ده نوم دي ولیکي.

وروسته همدغه کس د هغه کس نوم نه اخیستو لوړه کوي، چې مشال خان په ډزو ولي او وايي، چې د نامه څرګندونکی به (غدار) وي.

دغه ویډیو کې شته کسان یوه بل ته مبارکۍ وايي او په شاوخوا کې د تکبیر نارې اورېدل کېږي.

له دې مخکې د مشال خان وژنې ویډیويي کلیپ هم خپور شوی و او پولیسو د هغې ویډیو له مخې یو شمېر مشکوک کسان نیولي دي.