تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د پاکستان ټول-ګوندیز کنفرانس: د کډوالو موده دې وغځول شي
- Author, رحمان الله بي بي سي
- دنده, پېښور
پاکستان کې د افغان کډوالو په تړاو د ټولو سياسي ګوندونو غونډې کې په دغه هېواد کې د کډوالو د پاتې کېدو مودې پر غځولو خپله بې باوري ښودلې.
د افغان کډوالو مشرانو بي بي سي ته وويل د پاکستان حکومت غواړي هم په نړېواله کچه خپل ځان له بدنامۍ وساتي او هم افغان کډوال خپل هېواد ته تللو ته مجبور کړي.
د پاکستان د سرحدونو وزارت له خوا رابلل شوي ټول-ګونديز کنفرانس کې د کډوالو د اوسيدو موده د ۲۰۱۷ کال د ډسمبر تر مياشتې د غځولو وړانديز وشو.
د ټول-ګونديز کنفرانس په وړانديز به فيصله د مرکزي کابينې په غونډه کې وشي.
د پاکستان د سرحدونو د مرکزي وزير عبدالقادر بلوڅ په مشرۍ دغه غونډه کې د پاکستان تحريک انصاف، جماعت اسلامي، جمعيت علمای اسلام، عوامي نېشنل، پاکستان مسلم ليګ (ق) او قومي وطن مشرانو ګډون درلود.
د سرحدونو د چارو سکټر محمد شهزاد ارباب وویل غونډه کې د افغان زده کوونکو، ناروغانو او سوداګرو په بېلابېلو برخو کې د وېشلو او په اړه یې د تګ لارې جوړولو وړانديز هم شوی.
ښايي د پاکستان حکومت د ټول-ګونديز کنفرانس دغه وړانديز ومني او د کابينې په غونډه کې د افغان کډوالو د اوسېدو موده د کال ۲۰۱۷ تر ډسمبر وغځولی شي.
په مرکزي ښار پېښور کې د افغان کډوالو د ښوونځي يو پخوانی مشر نقيب الله وایي د پاکستان حکومت له خوا د کډوالو په دغه هېواد کې د پاتې کېدو نوې تګلارې د کډوالو کاروبار او ژوند اغېزمن کړی.
نوموړی زياتوي اوس کډوال خپله غواړي چې افغانستان ته ولاړ شي.
هغه وايي د پاکستان حکومت پر پرېکړو کډوال بې باوره ښکاري او بله خوا کډوالو خپل کاروبارونه راټول کړي.
وړاندې د پاکستان حکومت کډوالو ته د ۲۰۱۷ کال مارچ میاشت پورې په دغه هيواد کې د اوسېدو وخت ټاکلی ؤ.
د ښوونځي پخوانی ښوونکی نقيب الله وایي د پاکستان حکومت هدف دا دی چې په نړيواله کچه هم خپل نوم بدنام نه کړي او هم کډوال خپل هېواد ته بېرته تللو ته مجبور کړي. نوموړی زياتوي د افغان کډوالو ځورول د افغان کډوالو په اړه د پاکستان حکومت داخلي تګ لاره ښکاروي.
بريالۍ ميا خېل پر افغان چارواکو هم کلکې نيوکې وکړې چې د کډوالو په اړه کوم روښانه پلان نه لري. نوموړی زياتوي د پاکستان حکومت له خوا کډوالو ته لږې مودې لپاره پاکستان کې د پاتې کېدو يوه موخه دا هم کيدی شي چې افغان چارواکي د کډوالو په اړه روښانه تګلاره جوړه کړي.
د یوې شمېرنې پر بنسټ، پاکستان کې اوسمهال د ثبت شوو کډوالو شمېر ۱،۵ ميليونه دی. خو د غير راجسټر کډوالو شمېر يو ميليون دی.
پاکستان کې د غير راجسټر شوو کډوالو نېټه د سه شنبه په ورځ بشپړه شوه، خو لا هم د پاکستان حکومت د غير راجسټر شوو کډوالو په اړه کومه نوې پاليسې نه ده جوړه کړې.
