ولي عبدالله د پروگرام وړاندې کوونکى

	اوومه سټوډيو د چمعى په ماښامنۍ خپرونه کې خپريږي

دا خپرونه دلته واورئ

ميرمن بياباني په ۱۹۶۳ کال کې د کندهار په ښار کې زېږېدلې ده، پلرنی ټاټوبی او د خاپوړو ځای يې کابل دى.

دغې پښتنې شاعرې خپلې لومړنۍ زده کړې پخپل کلي کې او تر دې وروسته يې خپلې دويمې زده کړې د جلال آباد په الايي لېسې او د کابل د رابعه بلخي په لېسې کې سر ته رسولي. په افغانستان کې د ګډوډۍ او کورنيو جګړو له امله يې لوړې زده کړې ترې نيمګړې پاتې شوې.

نجيبه سارا بياباني په افغانستان او پښتونخوا کې ګڼ شمېر دندې ترسره کړي. د کاري ژوند پيل يې د زده کړې له کالونو نه پيل شوی او د ۱۳۵۲ لمريز کال نه تر ۱۳۷۰ لمريز کال پورې د افغانستان په راډيو کې بېلابېلې دندې ترسره کړي. د افغانستان په راډيو کې يې لومړنۍ دنده د ماشومانو د خپرونې د وياندۍ نه پېل شوې، همدا راز د ډرام او ډيالوګ په برخه کې يې تمثيل زده کړ.

تر څه مودې کار ورورسته بيا د هنر او ادبياتو په څانګه کې د حرف خوش صدای خوش و آهنګ خوش، جمعه او زموږ ډالۍ د خپرونو کوربنه او د شومه دم انګازې د خپرونې جوړونکې او ډيکليمه کوونکې، د پښتنو او بلوڅو د خپرونې جوړونکې او ويانده، د روزنې څانګې پورې اړونده د کلي کور او کرهڼې د خپرونې ويانده پاتې شوې.
کله چې د افغانستان کورنۍ جګړې تودې شوې د خپلې کورنې سره پېښور کې کډواله شوه نو هلته يې هم د ژوند و ژواک لپاره هلې ځلې پيل کړي . د وحدت په ورځپاڼه کې د خبريالې په توګه لنډ مهاله کار کړی، تر دې وروسته يې د هېواد په ورځپاڼه کې د ښځو لپاره د ګل پاڼې ځانګړې پاڼې بنسټ کېښوده او درې کاله يې ورته ليکنې چمتو کولې، همدا راز يو نيم کال يې د پامير ورځپاڼې سره هم د خبريالې په توګه دنده ترسره کړې. د پېښور د راډيو سره يې هم قلمي همکاري کړې، او د پېښور په ټلويزون کې يې دنده سر ته رسولې.

په پېښور کې يې د بي بي سي د پښتو او دري ژبې د روزنيزې پروژې د پيل هلې ځلې کړي او د نوي کور او نوي ژوند د پښتو او دري راډيويي ډرامو په بنسټ ايښودلو کې يې دنده ترسره کړې.

نجيبه سارا د شعرونو څلور ټولګې چاپ شوي. لومړۍ شعري ټولګه یې د کابل د کورنيو جګړو ښکار شوه خو تر اوسه پورې يې چې کوم کتابونه چاپ شوي هغه په لاندې ډول دي.

د ماښامونو ډيوه - د شعرونو ټولګه، چاپکال (1994)
د پنجرې مرغۍ - د شعرونو ټولګه، چاپکال (2003)
تاته کيسه په نثر که نوم د نظم درکړم؟ - د آزاد نظمونو او ليکنو غورچاڼ، چاپکال (2003)
زما د عشق جونګړه ورانه شوله - د هېوادپاله شعرونو ټولګه، چاپکال (2003)

د نوموړې ګڼ شمېر ناچاپه آثار لا تر اوسه نه دي چاپ شوي. سارا بياباني د شعرونو تر څنګ لنډې کيسې او داستانونه هم ليکلي چې تر اوسه پورې يې لا نه دي خپاره کړي. د ټولنيز ژوند په اړه په بېلابېلو موضوعګانو باندې يې هم د يو کتاب تکل کړی چې پدې ورستيوکي ئي دليکلوکار بشپړ شوی. نوموړې د پښتو ژبې تر څنګ په دري ژبه هم څو ټوټې شعرونه ليکلي اوهمداډول ئي په نارويژي ژبه هم شعرونه هم خپاره شوي دي .
نجيبه سارا بياباني د څلورو ماشومانو مور ده او له ۱۹۹۹ زېږيز کال نه راپدېخوا د ناروې په هېواد کې د کډوالۍ شپې سبا کوي.

د پروگرام د خپريدو وخت د جمعې د ماښام اووه نيمې بجې.

که د اوومى سټوډيو له ميلمه څخه پوښتنې لرئ نو د پروگرام پر مهال په دې شمېره زنگ ووهئ. ٠٠٤٤٢٠٧٨٣٦٠٣٣١

د بريښنا ليک پته ده: [email protected]

او د SMS له لارې هم خپله د تيلفون شميره او ليکلي پيامونه راليږلي شۍ. د SMS شميره ده: 00447786208888