عبدالصمد روحاني او الياس وحدت

	په سويل كې روان تاوتريخوالى هره ورځ دگڼو انسانانو ژوند اخلي او د ښكېلو غاړوترڅنګ پکې ولسي وګړو ته هم پکې زيان اوړي

په سويل ختيځ ولايت خوست کې چارواکي وايي د ملي پوځ دوه سرتېري سهار هغه مهال ووژل شول چې گاډى يې د سړک پرغاړه ماين باندې وخوت.

جنرال مراد علي مراد، په سويل ختيځ کې د پوځ يو چارواکى، وايي سرتېرو يې نن په دوه مندو ولسوالۍ کې گزمه کوله چې پر سړک ښخ شوي ماين وربرابر شول او دوه سرتېري مړه شول. يو سرتېرى ژوبل شوى هم دى.

دكندهار چارواكي وايي تېره شپه ددغه وولايت په ژېړۍ ولسوالۍ كې په يوه وسله واله نښته كې لس طالبان وژل شوي چي ددوى په وينا دځينو مړي يي اوس هم دجګړې په ميدان کې پراته دي .

چارواكي وايي په دغه جګړه كې يو افغان سرتيري هم وژل شوى او يو بل تن ټپي شوى دى .
دوى وايي نښته هغه مهال رامنځته شوه چي وسله والو طالبانو دسرتيرو پريوې امنيتي پوستې بريد وكړ .

طالبان خپله مرګ ژوبله نه مني او ادعا كوي چي دكندهار دپنجوايي ولسوالۍ په نلغام سيمه كې يې دافغان پوځ ١١ سرتېري وژلي دي . خوافغان چارواكي د طالبانو ددغې ادعا پخلى نه كوي .

دكندهار دګاونډ دهلمند په سنګين ولسوالۍ كې بيا ديوۀ ځاى پرځاى شوي ماين په چاودنه كې درې كوچنيان وژل شوي .

دسنګين چارواكي وايي دچاودني وروسته دوه كوچنيان ځاى پرځاى ووژل شول اودرېيم تن يې د برتانوي ځواكونو په روغتون كې ساه وركړه .

هاخوا، د زابل ولايت په شينكۍ ولسوالۍ كې چارواكو دپنځو طالبانو دوژل كېدو ادعا كړې.
سيمه ييز امنيتي چارواكي وايي په وژل شويو طالبانو كې ددغې ډلې يو قوماندان ملاعبدالكبير هم شامل دى .

دطالبانو يو وياند قاري يوسف احمدي دغه ادعا ردوي اوپر پېښه ځان ناخبره بولي .

دافغانستان په سويل كې روان تاوتريخوالى هره ورځ دگڼو انسانانو ژوند اخلي او د ښكېلو غاړوترڅنګ پکې ډېر زيان ولسي وګړو ته هم اوړي.