دا لومړى ځل نه دى چې پوليس په هرات کې د دا ډول بريدونو نخښه گرځي. په تېر يوه کال کې گڼ ورته بريدونه شوي

د سلمى بند د ساتنې د پوستو قوماندان عبدالحميد له خپلو دريو ساتونکو سره په دې بريد کې مړ دى او درې نور ساتونکې يې ټپيان شوي.

بريد هرات ښار ته نژدې په گوزره ولسوالۍ کې تېره شپه شوى.

د هرات د پوليسو وياند نورخان نيکزاد وايي عبد الحميد د شپې کورته پرلاره و چې وسله والو کسانو ورته کمين ونيو. دى وايي په بريد کې ځاى په ځاى درې تنه مړه شول او يوۀ بل ساتونکي وروسته په روغتون کې ساه ورکړه.

ښاغلي نېکزاد څرگنده نه کړه چې بريد کوونکي څوک و، خو زياته يې کړه چې پلټنې روانې دي. ده وويل د ټپيانو حالت د ډاډ وړ دى.

هرات ولايت په تېر يو کال کې د خال خال، خو ځينو خونړيو بريدونو شاهد و.