احمد الهام له کندز څخه

	د کندز ولايت په پرتليزه توگه ارام بلل کيدۀ او دا په څو کلونو کې يوازې دويم ځانمرگى بريد دى چې دغلته پېښيږي

د خوست او کندهار تر ځانمرگو بريدونو وروسته نن ( دوشنبې د وري ٢٧ د اپريل ١٦ ) په شمالي ولايت کندز کې يوۀ ځانمرگي د پوليسو د يوۀ روزنځاى مخته ځان وچووۀ چې د لومړنيو معلوماتو ترمخه پکې لږ تر لږه ٩ کسان وژل شوي دي .

د ځينو سرچينو په وينا په دغه پېښه کې شاوخوا ٢٦ کسان ټپيان شوي هم دي چې د څلورو وضعه يې ښه نه بلل کيږي .

د کندز ولايت په پرتليزه توگه ارام بلل کيدۀ . په افغانستان کې د ځانمرگو بريدونو له پيل راهيسته په دغه ولايت کې دا يوازې دويم دغه ډول بريد دى .

د ٢٠٠٧ کال له پيل څخه راهيسته په ټول افغانستان کې دځانمرگو بريدونو شميره تر ٣٠ اوړي .

رپوټونه ښيي چې په دغه ډول بريدونو او نورو چاودونو کې يوازې په تيرو درې نيمو مياشتو کې شاوخوا ٤٠٠ افغانان وژل شوي دي چې ډيره برخه يې د ملکي کسانو ده .

د کندز دغه ځانمرگى بريد په داسې ورځ شوى چې د بشري حقونو د څار نيويارک ميشتې ټولنې له خوا نن په يوۀ خپريدونکي رپوټ کې د ملکي کسانو د وژنې د مخنيوي لپاره غږ شوى دى .