ارش پاکطين

	دوى درې مياشتې وړاندې کوژده وکړه او اوس يې واده دى

دا د فلم جوړونکو لومړنۍ کورنۍ ده چې خپل د واده مراسم له نورو پټ ساتي. په هغه کور کې چې د واده مراسم تر سره کيږي د لرگيو په مټ يې شاوخوا پوښل شوى چې د کورنۍ له شخصي مراسمو څخه څوک عکس وا نه خلي.

د مراسمو پر مهال به شاوخوا څلور سوه پوليس امنيت ساتي او نا بلليو ميلمنو ته به اجازه نه ورکوي چې ودانۍ ته دننه ور ننوځي.

د واده مراسمو ته يوازې د گوتو په شمار څو پيژندل ميلمانه بلل شوي دي. لکه د فلم جوړونې د کمپنۍ مشر انيل امباني (Anil Ambani او سياسي کار پوه امرسنگ (Amar Singh) سربيره د باليود ځينې وتلي ستوري لکه کاجول، اجى ديوگن، پريتې زينتا او سنجيدت هم بلل شوي دي.

که څه هم د بچن د کورنۍ د واده مراسمو ته د باليود وتلي ستوري لکه شارخ خان،اميرخان،هيرتک روشن او راني مکرجي نه دي بلل شوي خو د ميليمنو په لست کې د زوم د ماشوم توب ملگري اپوروا لخيا (Apoorva Lakhia) او روحان سيپي ( Rohan Sippy) شامل دي.

د دغې کورنۍ خپل خپلوان وايي د بچن کورنۍ له دې امله د واده مراسم کوچني نيولي چې د زوم د انا روغتيايي حالت ښه نه دى او په روغتون کې يې درملنه روانه ده.

د واده مراسم به د هندوانو په رسم او رواج تر سره کيږي.

د واده مراسم به د غرمې پر مهال داسې تر سره کيږي چې يوه ډله کسان به د زوم په مشرۍ د يوې غونډې په توگه هغه ځاى ته ورځې چيرته چې ناوې يې انتظار باسي.

وروسته به نجلۍ او هلک د هندوانو د مذهب په اساس له يوبل سره داسې نکاح تړي چې د اور تر شاوخوا به اوه ځلې را تاويږي.

څنگه چې دا د هندوانانو د واده مهمه برخه گڼل کيږي نو نوې جوړه به په سيميز وخت په پنځه نيمې بجې چې دوى ته مناسب وخت گڼل کيږي دغه مراسم تر سره کړي.

د راپورونو له مخې اميتابچن او د هغه ښځې جيا د جوړه کسانو د نڅا کولو لپاره ځانگړى ځاى په پام کې نيولى چې هلته به ښځه او ميړه دواړه نڅا کوي.

د پنجشنبې شپه د نکريزو شپه وه چې د ناوې لاسونه د راتلونکي ورځې لپاره په نکريزو سره کړي و.

راپورونه وايي له واده وروسته به دغه نوې جوړه د عسل مياشتې د رخصتى لپاره چيرې ولاړه نه شي ځکه چې د اميتابچن د مور او د ناوې د خواښې روغتيايي حالت ښه نه دى او ابيشک بچن غواړي چې له خپلې انا سره واوسي.