خپلواک ساپى له کابله

والي عبدالحکيم منيب بي بي سي ته ويلي چې سيلابونو د چارچينو او دهراوت په ولسواليو کې په سلگونو کورونه او په لسگونو زره جريبه کرنيزه ځمکه ويجاړه کړې او په زرگونو څاروي يې هلاک کړي دي .

ښاغلي منيب په مرکزي حکومت او نړيوالې ټولنې له تاواني شويو خلکو سره د گړنديو مرستو غږ کړى دى .

د ارزگان په ولايت کې د تيرې اونۍ د سيلابونو په ترڅ کې د اوښتي تاوان ددقيقې کچې د معلومولو لپاره لا اوس هم پلټنې روانې دي .

وروستۍ موندنې د اوښتي تاوان کچه تر هغه څه څو وارې زياته ښېيي چې په سر کې يې فکر کيده . د ولايت والي عبدالحکيم منيب د اوښتي تاوان رابرسيره کيدونکو بيلگو ته په اشارې سره وايي چې دغو سيلابونو په سونو کورنۍ د پولۍ پړک ته کيونولي دي .

د ده په وينا د ډيرو کورنيو غړو تش تور په يو جوړ کاليو کې له افت نه د تيښتې وس موندلى او د خوراک او پوشاک زېرمې يې له خاورينو کوډلو سره يو ځاى په سيلاب لاهو شوي دي .

د ښاغلي منيب په وينا اوس تر ټولو بيړنۍ اړتيا بې کوره شويو خلکو ته د استوگنې د يوه موقتي کمپ جوړول دي .

ښاغلى منيب زياتوي چې د ځايي ادارې لپاره دغه پخپپله ېوه درنه او له وسه وتلې چاره ده . دى سمدستي پر افغان حکومت او نړيوالې تولنې د دغه ډول يوه کمپ په جوړولو او ورپسې له بې کوره شويو خلکو سره د سرپناه د بيرته ابادولو په برخه کې د مرستې غږ کوي .

که څه هم چې په دغو سيلابونو کې د ځاني تاوان کچه څه د ISAF‏ او افغان پوځ د ژغورونکو عملياتو او څه د سيند او سيلابونو له گواښونو سره د مقابلې لپاره د ځايي اوسيدونکو د چمتووالي له برکته کمه ښودل کيږي.

خو په سيلاب کې د کرنې د ويجاړې شوې ځمکې اندازه هم اوس د لومړنيو اټکلونو خلاف په لسگونو زره جريبه ښودل کيږي .

دا ډول ويل کيږي چې د تيښتې په مهال له کورنيود تر شا پاتې ځارويو ديره برخه هم سيلابونو له ځانه سره وړې ده .

دا په داسې حال کې ده چې کرنيزه ځمکه او د څارويو پالنه د دغه ولايت د دوديز اقتصاد مهمه برخه جوړوي .

ويل کيږي چې داوښتي تاوان ځاى ته راوستل يا خو تر ډيره ناشوني او يا هم ښايي د اوږدو کلونو خبره وي .