الياس وحدت له خوست څخه

	د خوست ولايت د وزيرستان په پوله پروت دى ، افغان حکومت وايي چې په وزيرستان کې وسله وال طالبان او القاعده غړي پټ دي

د زيانمنې كورنۍ غړي وايي چې د شپې ناوخت مهال د دوى د مېلمنو كوټې ته نامعلوم کس چاوديدونكي توكي ورغورځولي او د كور پر يوۀ غړي سربېره يې دوه ورغلي ميلمانه هم وژلي دي.

د كورنۍ وژل شوى ديني عالم د خوست د باك ولسوالۍ په ديني مدرسه كې طالبانو ته د حديث زده كړې وركولې او كورنۍ يې وايي چې له چا سره يې هېڅ شخصي دښمني هم نه لرله.
سيمه ييز دولتي چارواكي وايي چې د پېښې په اړه ورته ضد او نقيض راپورونه رسيدلي، خو سيمې ته يې د پلټونكو ځواكونو پلاوى ليږلى او له څېړنو وروسته به د پېښې اصلي لورى معلوم كړي.

د يادولو ده چې له دې وړاندې هم په خوست كې د هېواد د نورو سيمو په څېر ديني عالمان وژل شوي، خو كله له افغان دولت سره د ملاتړ په تور د وسله والو طالبانو له خوا او كله هم له هغو سره د همكارۍ په نوم د ناټو ځواكونو له لوري په دې دليل چې د نېولو پرمهال يې وسله وال مقاومت كړى وژل شوي دي.

خو د تېرې شپې پېښې جزييات تر اوسه نه دي معلوم، چې څه ډول او د چا له خوا شوې ده.