ارش پاکطين له کابله

	په افغانستان کې فساد او د پوليسو له خوا د خلکو د ځورونې مساله د ځينو په گومان خورا جدي ده چې پوره پام نه دى ورته شوى .

د پوليسو له خوا رشوت اخيستل او د عادي کسانو ځورونه د ځينو په گومان د لږ معاش او د جگړو د کلونو ميراث دى . دا هغه ستونزه ده چې حل لاره يې ژر نه ليدل کيږي. خو افغان چارواکي وايي چې دوى ورته هوډ کړى او هڅه يې دا ده چې ژر تر ژه دغه مساله حل کړي .

په پلازمينه کابل کې نيول شوي وروستي پوليس په دې تور نيول شوي چې له موټو چلونکو څخه يې په ناقانونه ډول پيسې اخيستې .

د کابل د امنيه قومندانۍ له جنايي جرمونو سره د مبارزې مشر مل پاسوال عليشا پکتياوال وايي دغو درو نيول شويو پوليسو به د شپې مهالې له موټر چلونکو پيسې غوښتې چې باالفعل ونيول شول.

دا لومړى ځل نه دى چې په کابل کې افغان پوليس د فساد په تور نيول کيږي له دې وړاندې هم ځينې افغان پوليس په دې ته ورته تورونو نيول شوي دي.

ځينې کسان که څه هم دغه ډول نيونې گټورې بولي خو زياتوي چې تر څو د دوى په وينا غټو کبانو ته لاس وانه چول شي د وړو په نيولو ښايي دغې ستونزې ته د پاى ټکى کېنښوول شي .