آرش پاکطين کابل

	د افغان ولسمشر وياند کريم رحيمي ژمنه وکړه چې ډير ژر به د فساد پرضد مبارزې کې " دقناعت وړ " نتيجې ترلاسه شي

دا په داسې حال کې ده چې د ولسي جرگې کې عدلي او قضايي اصلاحاتو استازي په افغانستان کې قانوني سرچينې په بډو او اداري فساد تورنوي.

د ولسمشر وياند کريم رحيمي نن په يوې خبرې ناستې کې وويل د وزيرانو په غونډې کې د اداري فساد او بډې اخيستنې په اړه سلامشورې شوي او په نژدې راتلونکي کې به يې پايلې په ډاگه شي.

ښاغلي رحيمي وويل په پام کې ده چې د افغانستان په لويه څارنولۍ کې د بډې اخيستنې او رشوت پر ضد اختصاصي څارنوالي او په سترې محکمه کې په دې اړه يو اختصاصي ديوان جوړ شي.

هغه زياته کړه دغه کار به د يو شمير حقوقي اداروله وړانديزونو وروسته تر سره شي.
((افغان ولسمشر يو له شمير قانوني او حقوقي ادارو غوښتي دي چې د فساد او بډې اخيستنې د مخنيوي لپاره په لويې څارنوالۍ کې د اختصاصي څارنوالي او په سترې محکمې کې د يوه يوان د جوړيدوپه اړه خپل وړانديزونه وړاندې کړي . دا په دې مانا ده چې په ادارو کې د فساد او بډې اخيستنې پر ضد جدي مبارزه به پلي شي.او په دې ترڅ کې به ډير ژر او د قناعت وړ پايلي لاسته ترلاسه کړو.))

هغه همدارنگه يادونه وکړه چې د بډې اخيستنې د جزا په قانون کې به هم ځيني بدلونونه راوستل شي چې رشوت اخيستونکي له کلکې سزاسره مخامخ شي.

خو د ولسي جرگې د عدلي، قضايي او اداري فساد پر ضد د کميسيون غړې ملالۍ شينوارې وايي تر قانون د قانون پلي کول مهم دى چې دا کار لا د دې په وينا لا ندى شوى:
((زمونږ ستونزه دا نه ده چې قوانين نه لرو زمونږ ستونزه داده چې قوانين نشو پلي کولې. مونږ له کلکيچونو سره مخامخ يو. بډه اخيستنه يوازې په يوه ارگان کې ندې بلکه په قضا،پوليس او يو شمير نورو ادارو کې هم شته . د پوليس دنده ده چې د بډو مخه ونيسي که چيرې خپله پوليس رشوت اخلي نو څنگه کولې شي چې د بډو مخه ونيسي))

په افغانستان کې د اداري فساد او بډې اخيستنې له امله ډير خلک پر دولت نيوکه کوي. او وايي د اداري فساد پرضد مبارزې کې دولت پاتې راغلى دى.

د يو شمير لوديدځو ورځپاڼو هم پر افغان دولت دا نيوکه ده چې گواکې په ادارو کې فساد او بډې اخيستنې ورځ په ورځ ډيريږي.

افغان دولت د اداري فساد د مخنيوي لپاره داداري اصلاحاتوپه نامه کميسيون جوړ کړى دى .