متين سمسور له کابله

	ښاغلي اتمر دې ته ورته پروگرام د کليو او پراختيا په وزارت کې درلود چې ډير بريالى و

دغه پروگرام د پنځو ميليونو ډالرو په ارزښت د کابل له ښونځيو پيل شو . د پوهنې وزير محمد حنيف اتمر د پروگرام د پيل په مراسمو کې د وينا په مهال وويل چې زده کونکي او ښونکي تر نورو ښه پوهيږي چې ښونځي ته پر بيلو شويو پيسو کوم کارونه وشي .

" کومو ځايونو کې چې خلک څارنه کوي ، هلته بډې نشته . کو مو ځايونو کې چې د زده کونکو مور او پلار څارنه کوي او ښونکي پريکړې کوي ، په دغو ځايونو کې به پيسې پر مهمو اړتېاوو لگول کيږي .

د کابل په ښار او ولايت کې هغو ښونځيو لپاره به چې ودانۍ نه لري ، راتلونکو شپږو مېاشتو کې ودانۍ جوړې شي پوهنې وزير محمد حنيف اتمر

د پوهنې يو وزير هم نه شي کولى چې له ښونکو او د زده کونکو تر مور او پلار د ښونځيو پر ستونزو ښه پوه شي .نو له همدې کبله بايد چې مالي امکانات هغو کسانو ته ورکړل شي چې تر نورو ښه پوهيږي چې بايد څه وشي ."

د دغه پرواگرام ترمخه به ، د ٥٠٠ زده کونکو لرونکو ښونځيو ته ٢٠٠٠ ، د ١٠٠٠ زده کونکو لرونکو ښونځيو ته ٣٠٠٠ او له ١٠٠٠ څخه د زياتو زده کونکو لرونکو ښونځيو ته ٥٥٠٠ ډالره ورکړل شي .

د پوهني وزير وويل چې ځينو ښونځيو وار دمخه يو لړ گټور پلانونه جوړ کړي چې دوى ته ورسپارل کېدونکې پيسې دې د ښونځيو پر کومو اړتېاوو ولگولې شي .

ښاغلى اتمر وايي چې د ځينو ښونځيو شوراگانو ښونځيو ته د کمپېوټرونو د اخېستلو ، ځينو يې د کتابتونونو او لابراتوارونو د جوړولو او يو شمير نور و يې د ښونکو د روزنې غوښتنه کړې ده .

په افغانستان کې د پوهنې سېستم اوسمهال له ډېرو نورو ستونزو سره هم مخامخ دى . يو زيات شمير ښونځي ودانۍ نه لري ، د مسلکي ښونکو شمير لږ دى او ټولو زده کونکو ته د زده کړې کتابونه نه دي رسيدلي . ښاغلى اتمر ددغو ستونزو پخلى کوي او وايي غواړي چې په دې برخه کې هم يو لړ پلانونه پلي کړي .

" پنځوس په سلو کې د کابل په ښار او ولايت کې هغو ښونځيو لپاره به چې ودانۍ نه لري ، راتلونکو شپږو مېاشتو کې ودانۍ جوړې شي ."

د پوهنې وزير محمد حنيف اتمر که څه هم چې ددغه ډول پروگرامونو او پلانونو پلي کيدل ، په هيواد کې د ښونې او روزنې د سېستم د څرنگوالي د ښه کيدو لپاره يو مهم گام بولي ، خو زياتوي چې ډېر وخت ته اړتيا ده چې په دې برخه کې ټولې شته ستونزې لېرې شي .