حنيف اتمر په دې وروستيو کې د ښوونې و روزنې د وزير په توگه په کار پيل کړى دى .

د بي بي سي له (( ستاسو غږ )) خپرونې سره په خبرو کې ښاغلي اتمر وويل په افغانستان کې د طالبانو له نسکوريدو راهيسته ٣٠٠ ښوونځي جوړ شوي دي چې د دوى په وينا په بل هيڅ وخت کې په دومره لنډې او کمې مودې کې داسې نه دي شوي .

ښاغلي اتمر وويل افغانستان لا هم ٧٠٠٠ ښوونځيو ته اړتيا لري . افغان وزير وويل تر اوسه ٩٠ ښوونځي په افغانستان کې د هغه چا له خوا سوځول شوي چې دوى د افغانستان دښمنان وبلل .

د بي بي سي د ستاسو غږ خپرونې د اوريدونکو پوښتنو ته په ځوابونو کې ښاغلى اتمر ژمن شو چې د ښوونکو ستونزو ته به پام کوي .

دوى له ولسه وغوښتل چې لکه د خپلو کورونو غوندې د ښوونځيو د ساتنې لپاره هم بډې ورپورته کړي .

د ښوونځيو سوځول افغان وزير د ولس او دولت دواړو ناکامي وبلله او ويې ويل چې ولس بايد په دې برخه کې له دولت سره ملاتړ واوسي .

افغان وزير ژمنه وکړه چې مدرسو ته به هم پام کوي او هڅه به يې دا وي چې له ښوونځيو سره جوخت د ديني درس لپاره هم لاره پرانيزي .