ارش پاکطين له کابله

	رپوټونه ښيي چې په افغانستان کې يو ميليونه کسان په نشه يي توکو روږدي دي .

د دغو مرکزونو له لارې به د هغو په سلگونو کسانو درملنه وشي چې په نيشو روږدي دي.

د غه روغتيايي مرکزونه د مخدره توکو سره د مبارزې وزارت ، يو ان او ډي سي يا مخدره توکو سره د مبارزې د نړيوال سازمان اوعامې روغتيا وزارت له لورې جوړيږي.

په همدې موخه دسه شنبې په ورځ ( د کب ٢ د فبرورى ٢١ ) د عامې روغتيا په وزارت کې درې اړخيز پروتوکول لاسليک شو

دغه شپږ روغتيايي مرکزونه د بلخ، کندهار،هرات، بدخشان،ننگرهار او کابل په ولايتونو کې په پام کې نيول شوي دي.

دعامې روغتيا وزير محمد امين فاطمي په يوې خبرې غونډې کې وويل په افغانستان کې په نشه يې توکو د روږدو کسانو شميره د ډ يريدو په حال کې ده. چې زياتره يې ځوانان دي

ښاغلي فاطمې زياته کړه هغه کډوال چې له گاوڼديو هيوادنو څخه افغانستان ته راغلي ډير يې په نشه يي توکو روږدي دي.

ده په ډاگه کړه چې د دغو روغتيايي مرکزونو په مرسته به د هغو سلگونو کسانو درملنه وشي چې په نشو اخته دي.

دعامې روغتيا وزارت له لورې به په دغو شپږو مرکزونو کې ٣٠ تنه هغه ډاکټران په دندو وگمارل شي چې د نشه يي توکو سره د مبارزې په برخه کې زده کړې ورکړل شوې دي.

نوموړي ډاکټران به د روږدو کسانو د درمنلې تر څنگ د مرکزونو له لورې خلکو ته د نيشو د ضررونو په اړه تبليغات هم وکړي.

د افغانستان دعامې روغتيا وزارت اود نشه يې توکو او جرمونو سره د ملگرو ملتونو ادارې د وروستيو څيړنيو له مخې اوس مهال په افغانستان نژدې يو ميليون کسان په نشه يي توکو روږدي دي.