محمد قاضي زاده له هرات څخه

	له کابله ورغلي د ملي پوځ په سلگونو سرتيري او ځايي امنيتي ځواکونه په واټونو گزمه کوي .

پرون په هرات کې د شعيه او سني مسلمانانو تر منځ په نښتو کې لږ تر لږه پنځه کسان وژل شوي وو او په لسگونو نور پکې ټپيان وو .

نن سهار په هرات کې کراري وه خو له ځايي وخت سره سم د ماپښين په دوه بجې په سلگونو مظاهره کوونکي د ښار په زړۀ او د والي دفتر ته نژدې ټول شول .

مظاهره کوونکو د ځايي مسوولينو د ليرې کولو او د هغو کسانو د محاکمې غوښتنه لرله چې د دوى په وينا په پرونيو پېښو کې ښکېل وو .

افغان ملي پوځ او پوليسو هوايي ډزې کولې چې مظاهره کوونکي سره خوارۀ کړي .

د نړيوالو سوله ساتو سرتيرو درې گادي هم ليدل شوي دي چې د والي له دفتر سره دريدلي دي .

افغان سرتيرو د والي له دفتره ليرې امنيتي کمربند جوړ کړى دى او هڅه کوي چې قهريدلي کسان د والي دفتر ته ورنه شي .

تر دې وړاندې افغانستان د اوبو او برېښنا وزير اسماعيل خان چې د ولسمشر کرزي له خوا د يوۀ لوړ پوړي پلاوي په مشري هرات ته پرون ليږل شوى و په يوۀ خبري کانفرانس کې تيره شپه وويل چې دوى پلټنې کوي او لا معلومه نه ده چې په دغو خونړيو پېښو کې د چا لاس و .

ښاغلي اسماعيل خان وويل په دو پېښو کې د هر څه امکان نه ردوي . د يوې پوښتنې په ځواب کې دۀ د گاونډيو هيوادونو لاس هم ممکن وبالۀ خو نور جزييات يې ورنه کړل .

له کابله ورغلي د ملي پوځ په سلگونو سرتيري او ځايي امنيتي ځواکونه په واټونو گزمه کوي .

تيره شپه د ماښام له ٨ بجو وروسته په هرات ښار کې گرځبنديز و .

د افغانستان نور خبرونه د دې ځاى په کېکاږلو ترلاسه کړئ