د ٢٠٠٨ کال د اروپا د فوټبال اتلوليو لوبې به په سويس او اتريش کې ترسره کيږي .

د غوراوي په لوبو کې به د اروپا د لويې وچې ٥٠ هيوادونه په ٧ گروپونو کې سره سيالي کوي چې د هر گروپ گټونکى او دويم نمبر راغلى هيواد به پکې غوره کيږي .

سويس او اتريش د کوربنو په توگه واردمخه په سياليو کې د گډون حق ترلاسه کړى دى .

په اوو گروپونو کې تر ټولو گران بي گروپ گڼل کيږي . په دغه ډله کې د ١٩٩٨ کال د نړيوالو اتلويو او په ٢٠٠٠ کال کې د اروپايي اتلوليو اتل هيواد فرانسه او د نړيوالو اتلويو او اروپايي اتلوليو يوه بله پخوانۍ اتله ايټاليا سره يو بل ته مخامخ دي .

په بي گروپ کې به له فرانسې او ايټاليا سره د غوراوي په لوبو کې اوکراين ، سکاټلنډ ، ليتوانيا ، گورجستان او فيرو ټاپوگان بخت ازمويي .

د اروپا د ٢٠٠٤ کال اتل هيواد يونان په سي گروپ کې له خپل پخواني سيال ترکيې سره مخامخ شوى دى .

په ډى گروپ کې جرمني له چيک جمهوريت سره ، په اې گروپ کې پرتگال له پولنډ سره ، په اي گروپ کې انگلستان له روسيې او کرويشيا سره ، په ايف کې سويډن او اسپانيا او په جي گروپ کې هالند او رومانيا هغه هيوادونه دي چې د برياليتوب ډيره هيله لري .

د لوبو نور خبرونه د دې ځاى په کېکاږلو ترلاسه کولى شئ