ديويد بيکهم د دوو ژيړو کاردونو په ليدو له لوبې وايستل شو .

انگلستان د ٢٠٠٦ کال فوټبال نړيوالو اتلوليو د غوراوي په لوبه کې اتريش ته يو صفر ماتې ورکړه . دا لوبه نن ( شنبه د تلې ١٦ د اکتوبر ٨ ) په متنچسټر انگلستان کې وشوه .

په دغه لوبه کې د انگلستان د ملي لوبډلې کپتان او مشهور لوبغاړى ديويد بيکهم د دوو ژيړو کاردونو په ليدو له لوبې وايستل شو .

دا د انگلستان له خوا په نړيوالو لوبو کې ١٠ ځل دى چې يو لوبغاړى د سرۀ کارد په ليدو له لوبې ايستل کيږي . بيکهم يوازينى لوبغاړى دى چې دغه کارد يې دوه ځلي په برخه شوى دى لوبه تر ډيره ورو روانه وه .

د انگلستان لوبغاړو زړۀ ماتې غوندې لوبه کوله خو په ٢٥ دقيقه کې مرستيال کپتان مايکل اوين د اتريش د يوۀ مدافع لوبغاړي له خوا ونيول شو او لوبڅار يا ريفري انگلستان ته پيناتي ورکړه .

فرنک لمپارډ د انگلستان له لورې د پيناتي دغه هڅه په گول بدله کړه خو له هغې وروسته انگلستان تر ډيره دفاع ته ملا وتړله . د لوبې په ٦٣ دقيقه کې د بيکهم تر وتلو وروسته انگليس لوبغاړو يوازې دفاع وکړه ..

	تر گول کولو وروسته لمپارډ ته د بيکهم له لورې مبارکي ويل کيږي .

انگلستان به د چارشنبه په ورځ ( د تلې ٢٠ د اکتوبر ١٢ ) له پولنډ سره لوبه کوي . که دغه لوبه د انگلستان په بري سر ته ورسيږي نو دوى به د ٢٠٠٦ کال اتلوليو ته غوره شي .

په يوه بله لوبه کې ويلز شمالي ايرلنډ ته درې په دوه ماتې ورکړه . بلاروس يا سپينې روسيې سکاټلنډ ته د يوۀ گول په ورکولو برى ترلاسه کړ .

د ايرلنډ جمهوريت له قبرس څخه لوبه په يوۀ گول وگټله . د نورو لوبو پايلې په دې ډول وې :
بلغاريا ٢ هنگري صفر

فينلډ صفر رومانيا ١

گورجستان صفر قزاقستان صفر

لتوانيا صفر سربيا مونتينيگرو ٢

روسيه ٥ لگزمبورگ ١