د جانتن بيلې رپورټ

	ولسمشر بوش له شوکت عزيز سره په خبرو کې وويل چې په پسرلي کې به هند او پاکستان ته سفر کوي .

د دوى ترمنځ خبرو کې ښاغلي بوش وويل چې دى به د مارچ په مياشت کې هند و پاکستان ته سفر کوي .

په دې وروستيو کې د امريکا له خوا د توغندي له يوۀ بريده وروسته چې پکې لږ تر لږه ١٨ کسان ووژل شول د واشنگټن او اسلام اباد تر منځ حالات ترينگلي دي .

ښاغلي عزيز په ښکاره د افغانستان پولې ته نژدې د دغۀ بريد غندنه کړې ده ، د بريد له امله په پاکستان کې امريکا ضد لويې مظاهرې وشوې .

کله چې ولسمشر بوش او د پاکستان لومړى وزير شوکت عزيز د کامرو مخته راڅرگند شول نو يوې پوښتنې ته يې هم ځواب نه وايۀ .

د دې پر ځاى يې يو څو لنډې خبرې د خپلو ستراتيژيکو اړيکو پر اهميت وکړې .

امريکاييانو لومړى له طالبانو سره او اوس له القاعدې سره مقابلې ته د پاکستان پر همکارۍ تکيه کړې ده .

خو په روانه مياشت کې د افغانستان پولې ته نژدې د متحدو ايالاتو د توغنديو بريد په پاکستان کې غصه پارولې او مظاهرې شوې دي .

داسې باور دى چې دغه بريد د القاعدې د مرستيال مشر د وژلو په نيت شوى و . خو د پاکستان لومړى وزير او ولسمشر سره يو خولۀ نه دي او بيلا بيل پيغامونه ورکوي .

ولسمشر مشرف وويل ښايي د القاعدې جنگيالي په دغۀ بريد کې وژل شوي وي خو لومړي وزير شوکت عزيز وويل داسې هيڅ شواهد نشته چې د القاعدې شته والى هلته وښيي ، ښاغلي عزيز دغه بريد غندلى دى .

خو د کامرو په شته والي کې ښاغلي عزيز ښه په احتياط له دغې موضوع ډډه وکړه .

د دې پر ځاى دۀ له امريکاييانو د تير کال د زلزلې په وړاندې د ورکړل شوي ځواب له امله مننه وکړه او ويې ويل چې دى د مارچ په مياشت کې پاکستان ته د ولسمشر بوش د سفر لارې څاري .

د پاکستان په باب نور خبرونه د دې ځاى په کېکاږلو ترلاسه کولى شئ