خپلواک ساپى له کابله

	داسې ښکاري چې د ښځو ونډه به په نوې ولسي جرگه کې د پام وړ وي

البته د ښځينه استازو دغه لاس برى تر ډيره د هيواد د اساسي قانون له مخې د ښځو په گټه د هغه مثبت تبعيض يا توپير پايله ده چې د پارلمان او ولايتي شوراگانو په سلو کې ٢٥ څوکۍ د ښځو حق بولي .

د قانون له مخې ښځو ته وربيلې شوې همدغې ونډې ته دراتلونکي پارلمان او ولايتي شوراگانو دننه د دود پالو او بدلون غوښتونکو تر مينځ د يوه نسبي انډول د رامينځ ته کيدو د لامل په سترگه هم کتل کيږي .

په بل عبارت ډير دا انگيري چې د پريکړو په مهال به برى د هغې ډلې وي چې ښځېنه استازې يې په پلوۍ لاس پورته کړي .

خو په يو شمير ولايتونو کې داسې ښځينه کانديدانې هم شته چې په خپل حيرانونکي بري سره د گټونکو کانديدانو د لست سر ته راوتلي او نارينه يې شا ته پرييښي دي .

په دې لړ کې د هرات له ولايت نه د ولسي جرگې کانديده فوزيه گيلاني د نژدې ١٦٩٠٠ رايو ، د غزني له ولايت نه د ولايتي شورا کانديده نفيسه عظيمي د شاوخوا ١٦٥٠٠ رايو او د کندز له ولايت نه عايشه بيگ د څه کم ١١٢٠٠ رايو په گټلو سره په خپلو خپلو ولايتونو کې تر نارينه وو مخې ته شوې او لومړي ځايونه يې نيولي دي .

د پارلمان په ټاکنو کې د رايه اچونکو ښځو شميره په سلو کې ٤٣ وه چې د ولسمشرۍ تر ټاکنو ډيره ده .

کابل بيا يوازينى ولايت دى چې ښځو پکې په ولايتي شورا کې دوى ته د وربيلو شويو اتوو څوکيو په ځاى لس څوکۍ گټلي دي .

خو برعکس ارزگان هغه ولايت دى چې په ولايتي شورا کې يې د ښځو د درې څوکيو ټوله ونډه تشه پاتې ده او د قانون له مخې به تر راتلونکو انتخاباتو پورې دغه درې واړه څوکۍ همدغسې تشې پاتې وي .

د دې تر څنگه ننگرهار او زابل هم هغه ولايتونه دي چې په ولايتي شوراگانو کې يې ښځو ته د بيلو شويو څوکيو په انډول سيالۍ ته د راوتلو ښځينه کانديدانو د شميرې د کموالي له کبله يوه يوه څوکۍ تشه پاتې ده .

ها خوا د کاريدلو رايو شميره دا هم ښيې چې په رايه اچونه کې په ځينو ولايتونو کې د ښځو ونډه تر نارينه وو پورته وه .

د ساري په ډول په پکتيا اوپنجشير کې د رايه اچونکو له مينځه په سلو کې تر ٥٨ ورپورته ښځې وې .

په نورستان کې هم ښځو تر نارينه وو زياتې رايې اچولي خو بر عکس زابل داسې يو ولايت دى چې د ښځينه رايه اچونکو شميره پکې په سلو کې له څلورو هم کمه ده .

په دى سربيره په هلمند او ارزگان کې په سلو کې ١٤ او په کندهار کې په سلو کې يوازې ٢٤ ښځو خپلې رايې کارولي دي .

دا ټول هغه ولايتونه دي چې وخت ناوخته پکې د حکومت پلوه او مخالفو جنگياليو تر مينځ د خرپ او ترپ جگړې هم رامينځ ته کيږي .

خو د انتنخاباتو گډ دفتر بيا په ټوله کې په دې باور دى چې په دې وروستيو انتخاباتو کې د ښځينه رايه اچونکو شميره د ولسمشرۍ د هغې په پرتله ډيره وه .

د دفتر چارواکي دغه ونډه په سلو کې ٤٣ ښيې . په داسې حال کې چې د ولسمشرۍ په انتخاباتو کې د ښځو ټوليزه ونډه په سلو کې ٤٠ عشاريه ٨ وه .