خپلواک ساپى کابل

	په کابل کې د بي بي سي پخوانۍ خبرياله ملالۍ شينوارې تر ټولو وړاندې ده

د اساسي قانون له مخې د پارلمان په سلو کې ٢٥ څوکۍ ښځو ته بيلې شوي دي، البته که په کوم ولايت کې ښځينه کانديدانې تر نارينه وو زياتې رايې وگټي نو له وربيلې شوې ونډې زياتې څوکۍ هم خپلولى شي .

خو اوس چې ورو ورو د رايې شميرنې لومړنۍ پايلې ډاگيزه کيږي ورسره دا خبره هم يقيني کيږي چې په پارلمان کې به د ښځو ونډه هماغه وي چې اساسي قانون د مثبت تبعيض يا توپير په بڼه وربيله کړى ده.

تر دا مهاله هيڅ داسې نښه نښانه نشته چې له کوم ولايت څخه دې له وربيلې شوې ونډې نه اضافي ښځينه کانديده پارلمان ته لاره ومومي .

د افغانستان پارلمان  د اساسي قانون له مخې د پارلمان په سلو کې ٢٥ څوکۍ ښځو ته بيلې شوي دي

د کابل په ولايت کې د نهو څوکيو لپاره د شاوخوا ٥٠ ښځينه کانديدانو په مينځ کې د بي بي سي پخوانۍ خبرياله ملالۍ شينوارې تر ټولو وړاندې ده . دويم ځاې د فاطمې نظري او درېيم د شکريه بارکزۍ دى .

په ننگرهار کې صفيه صديقي لومړۍ او نورزيه اتمر دويمه ده .په لغمان کې زيفون ساپۍ،په کونړ کې گلهار، په لوگر کې شکيلا هاشمي ، په خوست کې سايره شريف ، په کاپيسا کې طاهره ميرزاده ، په بادغېس کې ازيتا رفعت ، په دايکندي کې شيرين محسني ، په زابل کې زرمينه پټان ، په ارزگان کې سونا نيلوفر ، په پکتيا کې شريفه زرمتۍ ، په پکتيکا کې ناجيه سعيد ، په نيمروز کې صالحه ، په باميانو کې سهيلا او په نورستان کې حوا علم نورستانۍ ښځو ته د پارلمان د وربيلې شوې يوې يوې څوکۍ وړونکې برېښي.

په کندهار کې فريبا احمدي او شکيبا تر نورو وړاندې دي . په کندز کې شکريه پيکان او فاطمه عزيز ، په غزني کې ظاهره احمديار او شاگل رضايې ،په بغلان کې ناجيه او شکريه ، په بدخشان کې فوزيه او کبرا ، په غور کې رقيه او نوش افرين ، په فارياب کې فوزيه او اصفه او په بلخ کې صيفوره او حميرا اکاخيل تر نورو وړاندې دي .

خو د کوچيانو په مينځ کې بيا د وربيلو شويو دريو څوکيو د گټلو لپاره پروين درانۍ ، فهيمه احمدزۍ او پروين مومندلومړۍ، دويمه او درېيمه دي . دا پايلې وروستۍ ندي او د رايې شميرنې د بهير له پرمختگ سره سم پکې بدلون راځي .