کابل ښاروالي، د غره ډډې کورونه رنګوي

کابل ښاروالي وايي، له پلان پرته د جوړو شوو کورونو د ښه والي او د ښار د ښکلا لپاره یې د غره ډډې د کورونو رنګولو لړۍ پیل کړې ده.

د کابل ښاروالۍ په خبره، د ښار د بڼې ښایسته کولو او دغې چارې ته د خلکو د هڅونې لپاره یې د جوی شير سیمې د غره په لمنو کې د ۲۰۰۰ کورونو د رنګولو چارې پیل کړې دي.

د دوی په خبره، دغه کورونه به په ژیړ، سپین، نارنجي، سور او اسماني رنګونو رنګ کړي چې ځايي اوسېدونکي هم په دغه چاره کې ور سره مله وي.

ښاروالۍ باورمنه ده چې دا کار به د ښاریانو په روان ښه اغېز وکړي او ترڅنګ به یې په خلکو کې د ښار ښکلي کولو دود هم وده وکړي.

د پلازمېنې د پراختیا خپلواکې ادارې هم ویلي، دا چاره په خلکو کې د مالکیت حس پیاوړی کوي او د اوسېدو د متفاوت چاپېریال یوه تجربه ده.

کابل ښاروالۍ وايي، تر دې وروسته به د ښار نورې ابادې لمنې هم رنګ کړي.

د پلازمینې د پراختیا د خپلواکې ادارې مشر الهام هوتکي وايي، هغه سیمې چې کورونه یې له ښاري پلانه پرته جوړ شوي، پخوا له پراختیايي پروژو بې برخې وو.

نوموړي ویلي، د اوسېدو په بې پلانه جوړو شویو سیمو کې د ښوونځيو، روغتيايي مرکزونو او د تګ راتګ د لارو پر جوړېدو سربېره نورې اسانتیاوې هم په پام کې نیول شوې دي.

ورته تجربه کلونه وړاندې د مکسیکو د اوسېدونکو له خوا وشوه. د مکسیکو ښار رنګ او ښکلی شو. په خاورو دوړو ککړ دیوالونه یې په نظر جلبوونکو رنګونو وپسولل شول.

له دې کاره یې هدف د ریکارډ جوړول نه، بلکې د لوږې او ناامنۍ له امله د اندېښمنو ښاریانو خوشحاله ساتل و.