تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د اوکرایین جګړه؛ مسکو کې د ډرون تازه برید شوی
د روسیې د پلازمېنې مسکو ښاروال سرګیې سوبیانین ويلي، په دغه ښار کې بیا د ډرون بریدونه شوي دي.
د ښاغلي سوبیانین په وینا یو ځل بیا چاودېدونکی ډرون له هغه اسمانڅکي سره جنګول شوی چې د یکشنبې پر ورځ هم په ورته برید کې په نښه شوی و.
د مسکو ښاروال وايي دغه برید کې د 'موسکوا سېټي کمپلکس' د دې اسمانڅکې ودانۍ یوویشتم پوړ ته یو څه زیان اوښتی، خو مرګژوبله یې نه ده اړولې.
هغه زیاته کړې چې څو نور ډرونونه راغورځول شوي دي.
له دې سره د روسیې دفاع وزارت هم اعلان کړی چې د مسکو سیمه کې دوه اوکراییني ډرونونه د هوايي دفاع سیستمونو په وسیله ویشتل شوي دي.
د دغه وزارت اعلامیه کې راغلي چې دریم ډرون د بریښنايي جګړې تجهیزاتو په وسیله له ځپل کېدو وروسته موسکوا سیټي کمپلکس کې پر یوه غیر استوګنیزه ودانۍ راپرېوتی.
په دې وروستیو کې د روسیې پر پلازمېنې د ډرون بریدونه ډېر شوي او کرېملین یې پړه پر اوکرایین اچوي.
خو کیېف عموما په زغرده پر دغو بریدونو تبصره نه کوي.
د زېلېنسکي پر پلرني ټاټوبي خونړی برید
مسکو کې د ډرون تر دغو تازه بریدونو څو ساعته مخکې د اکرایین کریفيېریه ښار کې د روسیې په راکټي بریدونو کې د یوه ۱۰ کلن ماشوم او د هغه د مور په ګډون ۶ کسان وژل شوي وو.
د اوکرایین کورنیو چارو وزارت ویلي چې په دغو بریدونو کې نږدې ۷۰ کسان ټپي شوي هم دي.
د ځايي چارواکو په وینا د روسي ځواکونو توغندي د ملکیانو د استوګنې پر یوه لوړپوړیزه ودانۍ او یوه پوهنتون لګېدلي دي.
سیمه ییز والي سېرهي لیاڅک د دغه برید د قربانیانو په یاد یو ورځنی ماتم اعلان کړی.
کریفیېریه د اوکرایین د ولسمشر ولودمیر زېلېنسکي پلرنی ټاټوبی دی.
روسي ځواکونه پر دغه ښار پرله پسې بریدونه کوي.
همدا تېره جون میاشت هم دغه ښار کې د روسیې په پراخو راکټي بریدونو کې په یوه ورځ ۱۱ کسان وژل شوي او ۲۸ نور ټپي شوي وو.
کریفیېریه شاوخوا ۶۰۰ زره اوسیدونکي لري.
