تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
مسکو کې ډرون بریدونه؛ زېلېنسکي وايي جګړه کرار کرار د روسیې خاورې ته ورګرځي
د اوکرایین ولسمشر ولودمیر زېلېنسکي په مسکو کې تر ډرون بریدونو وروسته خبرداری ورکړی چې جګړه د روسیې خاورې ته ګرځېدونکې ده.
ښاغلي زېلېنسکي زیاته کړه چې د دواړو هېوادونو ترمنځ جګړه کې د روسیې پر خاوره بریدونه "حتمي، طبیعي او په بشپړ ډول عادلانه دي."
دا په داسې حال کې ده چې د روسیې دفاع وزارت وايي د یکشنبې سهار وختي مسکو کې درې ډرونونه رانسکور شوي چې دوه یې له دفترونو سره جنګېدلي دي.
د دغه ښار سویل لوېدیځ کې ونوکووا هوايي ډګر هم د لنډمهال لپاره تړل شوی و.
چارواکو ویلي د ډرون دغو بریدونو مرګژوبله نه ده اړولې خو دوو دفتري ودانیو ته یو څه زیان پکې اوښتی دی.
د دغو بریدونو له ځایه په خپرو شویو تصویرونو کې لیدل کېږي چې د ودانیو ښیښې ماتې شوې او پر ځمکه ویجاړۍ پرتې دي.
مسکو د اوکرایین له پولې شاوخوا ۵۰۰ کیلومتره واټن لري.
د ۲۰۲۲ کال په فبرورۍ کې پر اوکرایین له یرغل راهیسې که څه هم د روسیې پلازمېنه کې دا راز بریدونه کم شوي، خو بې ساري نه دي.
د روان کال می میاشت کې ان پر کرېملین ماڼۍ هم د دوو ډرونونو په وسیله د برید خبر ورکړ شوی و.
د اوکرایین ولسمشر د دغه هېواد په لویدېځ اېوانو فرانکیفڅکي ښار کې د ویډیو کنفرانس له لارې خبرو کې ویلي چې دوی ورو ورو پیاوړي کېږي.
ښاغلي زېلېنسکي وویل "نن په اصطلاح د 'ځانګړو پوځي عملیاتو' ۵۲۲مه ورځ ده چې د روسیې مشرتابه فکر کاوه په یو دوو اوونیو کې به بشپړ شي."
هغه زیاته کړه "جګړه په کرار کرار د روسیې خاورې ته ورګرځي – سمبولیکو مرکزونو او پوځي اډو ته یې او دا حتمي، طبیعي او کاملا عادلانه پروسه ده."
د یادونې ده چې کیېف مخکې دومره په زغرده د روسیې دننه د بریدونو مسوولیت نه مانه.
د اوکرایین ولسمشر د یکشنبې پر ورځ یوه بله وینا کې وویل چې روسیه د جګړې ډګر کې له ماتې سره مخ شوې.
خو هغه دا خبرداری هم ورکړ چې ښايي مني کې د اوکرایین د انرژۍ پر تاسیساتو بریدونه بیا ډېر شي.
روسیې تېر ژمي کې د اوکرایین د انرژۍ پر څه نا څه څلویښت سلنه تاسیساتو بریدونه کړي وو.
