تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
امریکا له اوکرايين سره بېرته مرستې پیل کړې او روسیه پر هغه ۳۰ ورځني اوربند غور کوي چې اوکرايين منلی
په سعودي عربستان کې د امریکا او اوکرايين تر منځ د مذاکراتو او په ترڅ کې یې د اوکرايين له لوري د ۳۰ ورځني اوربند له منلو وروسته امریکا له اوکرايين سره استخباراتي او امنیتي مرستې بېرته پیل کړې دي.
کریملېن وايي، تر هغه چې د دغو خبرو د پایلو په اړه معلومات ور نه کړل شي، دوی د امریکا له لوري د وړاندیز شوي ۳۰ ورځني بېړني اوربند د منلو او یا نه منلو په اړه تبصره نه کوي.
د کریملېن ویاند دیمېتري پیسکوف په خبري غونډه کې د خبرو پر مهال همدا راز د ولادیمیر پوتین او ډونلډ ټرمپ تر منځ د ټلیفوني خبرو امکان رد کړ او د امریکا له لوري د وړاندیز شوي اوربند په اړه یې وویل چې له وخته مخکې نظر نه څرګندوي او ګواکې د "بشپړو معلوماتو" ترلاسه کولو ته په تمه دي.
"اوس په ډګر کې توپ له روسیې سره دی"
د یادولو ده چې تر دې مخکې د امریکا د بهرنیو چارو وزیر مارکو روبیو چې په دغو خبرو کې د امریکا استازیتوب کوي، ویلي وو چې د اوکرايين تر منلو وروسته د اوربند وړاندیز د روسیې په مخ کې ږدي او په وینا یې، "اوس د لوبې په ډګر کې توپ له روسیې سره دی."
په سعودي عربستان کې د امریکا او اوکرايين تر منځ د تېرې ورځې تر مذاکراتو وروسته اوکرايين ویلي چې له روسیې سره د امریکا له لوري د وړاندیز شوي ۳۰ ورځني بېړني اوربند منلو ته چمتو دی.
د اوکرايين ولسمشر ولودیمیر زيلېنسکي ویلي چې اوس د امریکا کار دی چې څنګه روسیه د دغه "مثبت وړاندیز" منلو ته رضا کوي.
د اوکرايين د ولسمشر ولودیمير زېلینسکي د دفتر مرستیال پاولو پالیسا چې د جدې په خبرو اترو کې یې برخه اخیستې وه، وايي د امریکا پوځي مرستې اوکرایین ته بیا پیل شوې دي.
نوموړي پر خپله فېسبوکپاڼه لیکلي، "زه تائیدوم چې د امریکا له خوا امنیتي مرستې بیرته پیل شوې دي. د تړونونو پلي کېدل پیل شوي. جګړه دوام لري!".
په سعودي کې له اوږدو خبرو اترو وروسته، د امریکا او اوکرایین پلاوي په یوه ګډه اعلامیه کې اعلان وکړ چې کیېف د واشنګټن د سملاستي ۳۰ ورځني اوربند وړاندیز منلی دی، اوس دا د مسکو په هوکړه پورې تړاو لري.
دوې اوونۍ وړاندې په سپینه ماڼۍ کې د اوکرایین د ولسمشر او ډونلډ ټرمپ تر منځ ناندرۍ په ظاهرا د اوکرایین پوځ ته د امریکا د پوځي او استخباراتي مرستو د ځنډېدو لامل شوې وې.
د اوکرايين ولسمشر د دې ۳۰ ورځني اوربند لپاره د خپل هېواد چمتووالي ته په ځواب کې وویل، اوکرایین چمتو دی چې خپل ځمکني، هوايي او سمندري عملیات ودروي، او د هغه په اند د جدې د خبرو اترو پایله "مثبته وه" او دا چې اوس دا موضوع "په امریکا پورې اړه لري چې روسیه د اوربند منلو ته قانع کړي".
ښاغلي زېلینسکي، په یوه ویډیو بیان کې وویل، له امریکا سره د اوکراییني پلاوي د خبرو اترو یوه له مهمو برخو د اوکرایین پوځ ته د واشنګټن د استخباراتي مرستو بیا پیلول وو، چې د ده په وينا بیا پیل شوې دي.
ښاغلي زېلینسکي ټینګار وکړ چې "اوکرایین د سولې لپاره چمتو دی... روسیه باید اوس د جګړې د بندولو یا دوام ورکولو لپاره خپله اراده وښيي." د حقیقت د بشپړ څرګندېدو وخت رارسېدلی دی. زه له هر هغه چا مننه کوم چې له اوکرایین سره مرسته کوي."
د اوکرایین ولسمشر زېلینسکي، چې سعودي عرب ته سفر کړی، دا هم ویلي چې په دې خبرو اترو کې د ګډون پلان نلري او د دې سفر په جریان کې یې موخه د لوړ پوړو سعودي چارواکو سره لیدل وو.
سعودي کې د امریکا-اوکرايين د سولې خبرې پيل شوي، پر مسکو د ډرون "پراخ بریدونه" شوي
په داسې حال کې چې پر روسۍ پلازمېنه مسکو د اوکرايين ډرون الوتکو پراخ بریدونه شوي دي، د اوکرايين د بهرنیو چارو وزارت ویلي چې په سعودي عربستان کې یې له امریکايي چارواکو سره د سولې په اړه خبرې روانې دي.
په دغو مذاکراتو کې د اوکرايين په استازیتوب د ولسمشر ولودیمیر زیلېنسکي د دفتر مشر اندري یرمک او د دغه هېواد د ملي امنیت سلاکار او د بهرنیو چارو او دفاع وزیران ګډون کوي.
او په امریکايي پلاوي کې د بهرنیو چارو وزیر مارکو روبیو، د ملي امنیت سلاکار مایک والټز او د منځني ختیځ لپاره د دغه هېواد سفیر سټیو ویټکوف برخه لري.
د اوکرايين جګړې ته د پای موندلو په هڅه کې دا خبرې داسې مهال روانې دي چې هلته د روسیې ځايي چارواکو ویلي، په پلازمېنه مسکو او څېرمه سيمو کې د شپې د بې پيلوټه الوتکو "پراخ بریدونه" شوي چې لږ تر لږه دوه تنه پکې وژل شوي او دوه نور ژوبل دي.
د مسکو والي اندرې ووروبیف ویلي چې وژل شوي او ژوبل دواړه ملکیان دي او په وینا یې، په بریدونو کې د یوې هستوګنیزې ودانۍ اووو اپارتمانونو ته تاوان رسېدلی دی.
هغه پر خواله رسنۍ د هغو ودانیو او سوځېدلو ګاډو عکسونه خپاره کړي چې په دغو بریدونو کې زیانمن شوي دي.
د مسکو ښاروال سرګي سوبیانین ویلي چې د ښار پر لور ور روانې ۷۳ ډرون الوتکې یې غورځولې دي چې د هغو غورځېدو هم د یوه کور بام زیانمن کړی دی.
د روسیې دفاع وزارت هم د خبر پخلی کړی او ویلي یې دي چې تېره شپه یې په پلازمېنه مسکو او د دغه هېواد په نهو نورو سیمو کې ټولټال ۳۳۷ اوکرايينۍ ډرون الوتکې یا له منځه وړې دي او یا یې د هغوی د برید مخه نیولې ده.
اوکرايين تر اوسه په دې اړه کوم نظر نه دی څرګند کړی.
سعودي کې د امریکا او اوکراييني چارواکو تر منځ غونډه تر هغه وروسته کېږي چې په سپينه ماڼۍ کې د ډونلډ ټرمپ او ولودیمیر زيلېنسکي تر منځ لفظي شخړه وشوه.
تر دغو بریدونو وروسته په سیمه کې د اورګاډو چلښت درول شوی او د مسکو هوايي ډګرونو کې الوتنې هم ځنډول شوې دي.
دا په ۲۰۲۲ کې د اوکرايين د جګړې له پیل راهیسې پر روسیې تر ټولو لوی برید بلل شوی دی.
د یادولو ده چې پرون (کب ۲۰مه/مارچ ۱۰مه) د فرانسې او رویټرز خبري اژانسونو د یوه اوکراییني چارواکي له قوله رپوټ ورکړی و چې د اوکرايين ولسمشر ولودیمیر زيلېنسکي د سعودي عربستان له ولیعهد محمد بن سلمان سره د خبرو لپاره جدې ښار ته رسېدلی دی.
د رپوټونو له مخې، هغه به نن سې شنبه د اوکرایین او امریکايي پلاويو ترمنځ خبرو کې ګډون ونه کړي.
