د عمران خان وکیل: زندان کې د مخکېني لومړي وزیر "خوراک دال، د شپې له میاشو او د ورځې له مچانو کړیږي"

نن سه شنبه څلورمه ورځ ده چې د پاکستان پخوانی لومړی وزیر او د تحریک انصاف ګوند مشر عمران خان یې د پاکستان په یوه داسې زندان کې تېروي چې "وضعیت یې ډېر بد" بلل شوی.

د عمران خان د وکیلانو او پلویانو په وینا،‌ د اټک په زندان کې چې عمران خان تازه په کې بندي شوی، د درنو جرمونو سلګونه مجرمان بندیان دي.

له لومړي سره په پام کې وه چې ښاغلی خان به د اډیاله مرکزي زندان ته لېږدول کېږي، چې د نورو پرتله ښه امکانات او خونې لري خو وروسته نوموړی د اټک زندان ته چې یوازې دویمه او درېمه درجه سهولتونه لري ولېږدول شو.

د عمران خان یوه مدافع وکیل نعیم حیدر د نوموړي له نیول کیدو وروسته په لومړي ځل پرون (دوشنبه) له ښاغلي خان سره په دغه زندان کې کتلي او اوس یې د هغه ژوند د ژغورنې غږ پورته کړی.

نعیم حیدر چې شاوخوا دوه نیم ساعته له ښاغلي خان سره لیدلي له رسنیو سره په خبرو کې ویلي " عمران خان ته هیڅ سهولت نه دی ورکړل شوی، د شپې یې کوټې کې چینجي او میاشي وي او د ورځې مچان بنګیږي."

د ښاغلي حیدر په وینا عمران خان څخه یې د هغه د وضعیت په اړه څو پوښتنې وکړې او وايي عمران خان ورته ویلي "په خوراک کې دال ورکول کیږي، سرخلاصی تشناب لري چې د ځان مینځلو لپاره هیڅ لازم سهولت په کې نشته."

د ښاغلي خان وکیل وايي،‌ نوموړی په درېیمه درجه (سي کلاس) بندخونه کې اچول شوی او کوټه یې دومره وړه ده چې د لمانځه سم ځای په کې نشته.

له دې سره وکیل نعیم حیدر ټينګار کوي "عمران خان نه غوښتل پر خپل وضعیت شکایت وکړي خو ما هڅه وکړه چې د ده پر وضعیت وغږېږم تر څو خلکو ته حقیقت ورسیږي.

دی وايي عمران خان پر خپل دریځ ټینګ ولاړ دی او پیغام یې دا وه چې "د رښتیني خپلواکۍ تر لاسه کولو پورې به چاته سر ټيټ نه کړي."

نوموړی وايي، عمران خان په زندان کې د خپلو پلویانو نیولو په اړه هم اندیښمن دی.

د عمران خان د دې وضعیت له لېدو وروسته، د نوموړي وکیلانو نن (سې شنبه) په اسلام اباد کې له یوې محکمې غوښتي چې اډیاله جېل ته د هغه پر لېږدولو غور وکړي.

د نوموړي وکیل له محکمې عمران خان ته د خپل شخصي ډاکټر لخوا د معاینو غوښتنه هم مطرح کړې ده.

د پاکستان تحریک انصاف ګوند هم د عمران خان پر وضعیت اندیښنه ښودلي او په یوه بیان کې یې ویلي چې عمران خان له هغو حقونو هم محروم ساتل کېږي چې یو عادي زنداني باید ورکړل شي.

د پاکستان د حکومت غبرګون

د پاکستان د کورنیو چارو وزیر رانا ثناالله د عمران خان د وضعیت په غبرګون ویلي "ښه ده چې عمران خان د عامو زندانیانو په شان د اوسېدو تجربه وکړي."

د پاکستان له جیو نیوز تلویزون سره په خبرو کې نوموړي ویلي "عمران خان خپله په دې باور دی چې ټول خلک باید یو شانتې سهولت ولري، نو ښه ده چې اوس د عامو زندانیانو تجربه و ویني."

خو هغه دا هم رد نه کړه چې که عمران خان په اوسني وضعیت خوښ نه وي، اډياله زندان ته "چې لومړی درجه یا اې کلاس" سهولت لري، د بدلېدو غوښتنه له محکمې کولای شي.

نوموړي دا هم وویل چې د پخواني لومړي وزیر په حیث عمران خان حق لري چې پرتله ییز ډول ښه زندان کې وساتل شي خو وايي امنیتي اندیښنو ته په کتو د شنبې په ورځ له نېول کیدو وروسته دی اټک زندان ته ولېږدول شو.

نوموړي دا تور هم رد کړ چې ګویا د مچانو او چینجیو لپاره د عمران خان د کوټې شاوخوا قصدي خواږه او خواړه اچول کېږي.