تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
پېښور کې بورډ بازار ته نږدې چاودنه؛ پولیس وايي "د چاودېدونکو موادو لېږدونکي پکې وژل شوي"
د خیبر پښتونخوا مرکز پېښور کې چاودنې لږ تر لږه دوه کسان وژلي او یو بل ژوبل کړی دی.
د پېښې سیمې ته د نږدې خیبر روغتون ویاند رسنیو ته ویلي د دوی روغتون ته دوه کسان چې یو یې مړ او بل سخت ټپي و ور وړل شوي دي.
د معلوماتو له مخې دا چاودنه د ناصر باغ د پولیسو پوستې ته نږدې په ناصر باغ واټ، بورډ بازار کې شوي.
له چاودنې وروسته پولیسو د څه مودې لپاره سیمه کلابنده کړې وه او پلټنې یې کړې.
د پولیسو په لومړي رپوټ کې دا درې واړه کسان 'ترهګر' بلل شوې او په وینا یې کوم ولسي وګړي ته پکې مرګ ژوبله نده رسیدلې.
د ځایي پولیسو یوه مشر کاشف افتاب عباسي له رسنیو سره خبرو کې ویلي چې له ۴ تر ۵ کېلو چاودېدونکو موادو چاودنه کړې.
د هغه په ټکو "د بم خنثی کونکي ټيم د څيړنو له مخې دا ځانمرګی برید نه و بلکې چاودنه د چاودېدونکو موادو لېږد پر مهال رامنځته شوې."
پولیسو نه دي ویلي چې دا چاودیدونکي مواد چېرې وړل کېدل او یا د لېږدونکو اصلي موخه کوم ځای و.
د پولیسو په لومړني رپوټ کې هم راغلي چې "په چاودنه کې ولسي وګړو ته مرګژوبله نده رسیدلي او خپله د چاودونکو موادو لېږدونکي یې وژلي."
پاکستاني رسنیو تازه لیکلي چې د چاودیدونکو موادو د لیږدونکو هویت په ډاګه شوی او ویل کېږي چې ټول د پېښور اوسیدونکي وو.
د خیبر پښتونخوا نوي وزیر اعلی علي امین ګنډاپور او نورو چارواکو پېښه غندلې او له پولیسو یې د څرنګوالي رپوټ غوښتی دی.
پښتونخوا کې د تحریک انصاف نوي حکومت له تشکیل راهیسې دا پېښور کې لومړۍ چاودنه ده خو له دې مخکې د پښتونخوا په نورو سیمو کې ناامنیو وار له مخه د نوي حکومت توجه جلب کړي.
