تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
جګړه ځپلی اوکرایین لومړنی ځمکلاندې ښوونځی جوړوي
د اوکرایین په شمال ختیځ کې د خارکیف چارواکي وايي، دغه ښار کې په لومړي ځل ځمکلاندې ښوونځی جوړوي.
روسیه په دوامدار ډول پر خارکیف د توغندیو بریدونه کوي.
د جګړې له اوږدېدو سره ګڼ شمېر اوکراییني ماشومان ښوونځیو ته له تګ پاتې دي.
د خارکیف ښاروال اېهور تېرېخوف ویلي، د دغه ځمکلاندې ښوونځي له جوړېدو سره به زرګونو ماشومانو ته د توغندیو له ګواښ سره سره عملآ په ټولګیو کې د خوندي لیک لوست زمینه برابره شي.
دغه ښار کې ډېرې کورنۍ غواړي چې ماشومان یې ښوونځي ته ولاړ شي.
اوکراییني چارواکي وایي چې د ۲۰۲۲ کال فبرورۍ کې د روسیې له یرغل راهیسې تر ۳۶۰ ډېر ښوونیز تاسیسات ویجاړ او تر ۳۰۰۰ ډېر زیانمن شوي دي.
د ماشومانو لپاره د ملګرو ملتونو وجهي صندوق یونیسف ویلي، د توغندیو او ډرون بریدونو له وېرې، له هرو دریو یوازې یو اوکرایینی ماشوم مخامخ زدکړې کوي.
د دوی لویه برخه د اورګاډو تر ځمکلاندې تمځایونو او تونلونو او لنډمهالو ځایونو کې ټولګي لري چې اکثراً د تودولو اسانتیا په کې نشته.
تېره اوونۍ د اروپايي ټولنې د بنسټیزو حقونو اژانس وویل چې د دې ټولنې غړو هېوادونو کې ښوونځیو له جګړې د ورتښتېدلو اوکراییني ماشومانو په ادغام کې له ستونزو سره مخامخ دي.
اروپايي ټولنه وايي له ۱ اعشاریه ۳ میلیونو ډېر اوکراییني ماشومان دغه هېوادونو ته ورغلي دي.
اوس د خارکیف ښاروال یهور تېرېخوف وايي، د دوی ځمکلاندې ښوونځی به د دفاعي ودانۍ ټولې عصري اړتیاوې ولري.
تېره میاشت تر ۱۰۰۰ ډېرو خارکیفي زدکوونکو د ښوونځي نوی کال د اورګاډو تر ځمکلاندې تمځایونو کې پیل کړ چې میترو ښوونځي یې بولي.
خارکیف د اوکرایین دویم ستر ښار او د روسیې له پولې ۳۰ کیلومتره لېرې دی.
د روسیې د یرغل په پیل کې دغه ښار ته درانه زیانونه واوښتل.
اوس یې پاتې اوسېدونکي وايي د جګړې له دوام سره ژوند هم باید دوام وکړي او تر ټولو مهمې مسلې یانې زدکړو ته باید لارې چارې ولټول شي.
