طالبانو د مرستو په وېش کې د لاسوهنې په تړاو د سیګار رپوټ رد کړ

د مرستو وېشلو په بهیر کې په افغانستان کې د طالبانو د حکومت د لاسوهنې په اړه د افغانستان پر بیا رغونې د څار امریکايۍ ادارې سیګار رپوټ د طالبانو په حکومت کې د اقتصاد وزارت رد کړ.

دې وزارت د یوې خبرپاڼې په خپرولو سره ویلي چې حکومت هېڅکله د مرستو د وېش په بهیر کې د لاسوهنې تګلاره نه خپلوي.

د افغانستان پر بیارغونې د څار امریکايۍ ادارې مشر جان سوپکو تېره سې شنبه د کانګرېس د بهرنیو اړیکو د کمېټې یوې ناستې ته ویلي و چې په افغانستان کې د طالبانو حکومت له افغانانو سره د امریکا لخوا له بشري مرستو نه ګټه اخلي.

دغه راز سیګار په خپل وروستي رپوټ کې ویلي چې د طالبانو حکومت له هغو مرستو په نامستقیم ډول د خپلې ګټې لپاره کار اخلي چې امریکا د پوهنې برخه کې له افغانستان سره کوي.

د دې ادارې موندنې ښيي چې د طالبانو د کړنلارو له امله په ټوله کې د تعلیم کیفیت ټیټ شوی، د ښوونکو شمېر کم شوی او لږ تر لږه په اتو ولایتونو کې ښوونځیو کې د نویو شاملیدونکو زدکوونکو شمېر لس سلنه را کم شوی دی. رپوټ کې دغه راز ویل شوي چې طالبان نادولتي بنسټونه مجبوروي چې د دوی کسان وګوماري، او له هغو شرکتونو توکي را ونیسي چې د طالبانو اړوند دي.

درې میاشتې وړاندې هم سیګار په خپل درې میاشتنې رپوټ کې ویلي و چې د طالبانو حکومت د نادولتي موسسو او ملګرو ملتونو له لارې افغانستان ته د ورتلونکو پیسو په کنټرولولو کې مداخله کوي چې له امله یې بشري مرستې کمې شوې دي، خو هغه مهال هم د طالبانو مرکزي ویاند ذبیح الله مجاهد دغه ادعا رد کړه.

د مرستو د وېشولو په بهیر کې د لاسوهنې په اړه د سیګار د تازه ادعا د ردولو ترڅنګ د طالبانو په حکومت کې د اقتصاد وزارت د سیګار رپوټ بې بنسټه او په افغانستان کې له عیني بدلونونو سره په ټکر کې بللی دی.

دې وزارت په خپرې کړې خبرپاڼې کې ویلي حکومت تل هڅه کړې چې مرستې تر اړمنو په روڼتیا سره ورسېږي او حکومت د مرستو د وېش په بهیر کې د لاسوهنې تګلاره نه خپلوي او پر نړیوالو موسسو فشار نه اچوي، بلکې هڅه کوي چې د مرستو رسولو بهیر کې موسسو او نړیوالو بنسټونو ته لا ډېرې اسانتیاوي برابرې کړي.

په افغانستان کې د طالبانو له بیا واکمنېدو وروسته له افغانستان سره د نړیوالو مرستې کمې شوي چې له امله یې د ملګرو ملتونو بېلا بېلو ادارو وخت په وخت اړو خلکو ته د مرستو د رسولو په برخه کې د ننګونو یادونه هم کړې ده، هغه مرستې چې اوسمهال د نړیوالې ټولنې لخوا له افغانانو سره کېږي د ملګرو ملتونو د ادارو او ناودلتي موسسو لخوا پر افغانانو وېشل کېږي.

د سیګار اداره د امریکا د متحدو ایالتونو د کانګرېس لخوا د پروژو او د بیارغاونې د کړنو د تفتیش او څېړنې د ترسره کولو لپاره په کال ۲۰۰۸ کې جوړه شوې چې د ظرفیتونو د لوړولو او اغېزمن کولو ترڅنګ د بیا رغاونې په پروګرامونو کې د درغلیو، تقلب او بې ځایه ګټې اخیستنې مخنیوي وکړي. دا اداره هرو دریو میاشتو کې د امریکا کانګرېس ته خپل رپوټونه وړاندې کوي.