اسرائیل وايي د حماس مشر 'یحیی سنوار' وژل شوی
د عکس سرچینه، Reuters
د سنوار د مړینې د تایید په اړه د اسرائیلو د بهرنیو چارو وزیر اسراییل کاتز، د نړۍ په ګوټ ګوټ کې خپلو لسګونو همکارانو ته په یوه شخصي پیغام کې دا خبر استولی.
کاتز د پنجشنبې په ورځ وویل چې د غزې په جنوبي برخه کې د اسرائیلي ځواکونو په لاس د حماس د مشر یحیی سنوار وژل کېدل د تېر کال د اکتوبر د اوومې له برید وروسته په دې تړانګه کې د برمته شویو کسانو د خوشي کولو لپاره یو "فرصت" دی.
کاتز په یوه بیان کې وویل: "د سنوار له منځه وړل د یرغمل شویو سملاسي خلاصولو لپاره یو فرصت دی او په غزه کې د ژور بدلون لپاره لاره هواروي: له حماس او د ایران له کنټرول پرته."
بله خوا، د اسرائیلو ولسمشر اسحق هرتسوګ هم ویلي چې غزه کې د برمته شویو د خوشي کولو لپاره باید چټک ګام واخیستل شي.
نوموړي ویلي، یحیی سنوار د ۲۰۲۳ کال د اکتوبر د اوومې د بریدونو اصلي طراح و.
نوموړي پر ټوېټر "په غزه تړانګه کې د برمته شویو د خلاصون او ستنولو لپاره په هره ممکنه لاره چې وي" د ګام اخیستو غوښتنه کړې ده.
مخکې د اسرائیلو پوځ ویلي وو په غزه تړانګه کې د اسرائیلو پوځ عملیاتو په ترڅ کې درې "تخریبوونکي" وژل شوي، چې احتمالا د حماس مشر یحیی سنوار هم پکې دی.
حماس لا تر اوسه په دې اړه غبرګون نه دی ښودلی.
په ګډه اعلامیه کې راغلي: "په هغه ودانۍ کې چې تخریبوونکي په کې وژل شوي، په سیمه کې د تښتوونکو د شتون نښې نه شته، د اسرائیل پوځ د اړینو احتیاطي تدابیرو په رڼا کې سیمه کې کار کوي."
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
یحیی سنوار څوک دی؟
د عکس سرچینه، Reuters
یحیی سنوار د اګست په میاشت کې په تهران کې د خپل مخکیني اسمعیل هنیه له وژل کېدو وروسته د حماس عمومي مشر وټاکل شو.
هغه پخوا د غزې په تړانګه کې د دې ډلې د مشر په توګه دنده ترسره کوله. دی له ۲۰۱۷ راهیسې په دې دنده و.
سنوار اوس مهال د اسرائیلو تر ټولو مطلوب لېست کې لومړی ځای لري.
د اسرائيلو امنیتي ادارې وايي، سنوار چې په "ابو ابراهیم" مشهور دی، د اسرائیلو پر سوېل د حماس د تېر کال اکتوبر اومې بریدونو له اصلي طراحانو ګڼل کېږي چې اسرائیلو له ډېرې مودې راهیسې د هغه د موندلو او وژلو ژمنه کړې وه.
یحیی سنوار په ۱۹۶۲ کال کې د غزې په جنوبي برخه کې د خان یونس د کډوالو په کمپ کې زېږېدلی دی.
د ۱۹۸۹ لسیزې په وروستیو کې، سنوار د "مجد" په نوم د حماس امنیتي خدمت تاسیس کړ، چې د نورو شیانو تر څنګ یې له اسرائیلو سره فلسطیني همکاران هدف ګرځول.
هغه د خپل ژوند ډېره برخه د اسرائیلو په زندان کې تېره کړې - او په ۱۹۸۸ کې له درېیم ځل نیول کېدو وروسته هغه څلور ځله په عمري بند محکوم شو.
سنوار د هغو ۱۰۲۷ فلسطیني او اسرائیلي عرب بندیانو له ډلې و چې په ۲۰۱۱ کې د اسرائیلو لخوا د ګیلاد شالیت په بدل کې خوشي شول. اسرائیلی عسکر ګیلاد شالیت د حماس لخوا په غزه کې له پنځو کلونو راهیسې بندي و.
وړاندې، اسرائیلو د غزې شمال کې پر یوه ښوونځي بمبار کړی چې لس تنه پکې وژل شوي.
رویټرز خبري اژانس ویلي، اسرائیلو دغه نننی برید د غزې تړانګې شمال جبالیا کې کړی دی.
بله خوا، غزه کې د حماس تر واک لاندې د روغتیا وزارت وايي، په تېره یوه ورځ کې اسرائیلو غزه کې ۲۹ تنه وژلي او ۹۳ نور یې ټپیان کړي دي.
د ۲۰۲۳ کال اکتوبر پر اومه پر اسرائیلو د حماس د پراخ برید او بیا پر غزه د اسرائیلو بریدونو له پیلېدا راهیسې د اسرائیلو به بریدونو کې تر اوسه ۴۲،۴۳۸ فلسطینیان وژل شوي او ۹۹،۲۴۶ نور ټپیان شوي دي.
