سارا شریف؛‌ د پلار په ګډون د کورنۍ درې غړي یې د وژنې په تور نیول شوي

د بریتانیا د سوري سیمې پولیس وايي، چې د لس کلنې سارا شریف پلار، مور(میره)او تره یې د دې د وژنې په تور نیول شوي دي.

۴۱ کلن عرفان شریف، مېرمنه یې ۲۹ کلنه بینش بتول او د ښاغلي عرفان ورور ۲۸ کلن فیصل ملک تورن کسان دي.

په دوی تور دی، چې سارا شریف یې وژلې او یا یې پرېښې چې مړه شي.

د سارا مړی د اګست په ۱۰مه د هغې په کور کې وموندل شو.

د مړي طبي څېړنو وموندله، چې سارا په بدن "ډیر ټپونه" درلودل.

یاد درې واړه تورن کسان د اګست په نهمه له بریتانیا څخه پاکستان ته تللي وو.

دوی د انګلنډ په ګټویک هوایی ډګر کې د تېرې چهارشنبې په ماښام ونیول شول.

د سوري پولیسو د جمعې په ورځ سهار وختي تایید کړه، چې نیول شوي درې واړه کسان تورن ګڼل شوي دي.

مسولین وايي، د سارا شریف پلار، مور(میره) او تره نن جمعه ناوخته محکمې ته وړاندې کېږي.

د سارا پنځه خویندې او وروڼه، چې عمرونه یې د یوه او ۱۳ کلونو ترمنځ دي د اګست په نهمه له کورنۍ سره پاکستان ته تللي وو.

په پاکستان کې پولیسو یاد ماشومان د ښاغلي شریف د پلار په کور کې د دوشنبې په ورځ وموندل او دې هېواد کې یې د ماشومانو د روزنې او پالنې دولتي مرکز ته وسپارل.

د سوري پولیس وايي، د سارا خپله سکه مور یې وروستیو پرمختګ په اړه خبره کړې او د ځانګړو مسولینو ملاتړ ورسره دی.

تورن کسان پاکستان ته له رسیدو ورسته پټ شوي وو، چې پاکستاني پولیس د بریتانیا د امنیتي چارواکو په غوښتنه د دوی په لټه کې وو، تر هغه چې ونیول شول

د سپتمبر په ۵ مه د سارا شریف پلار او د هغې میرې په یوه ویډیويي بیان کې وویل،چې دوی چمتو دي د بریتانیا له امنیتي مسولینو سره په څېړنو کې مرسته وکړي.

دا د سارا شریف له مړینې وروسته د تورنو کسانو لومړنی بیان و.

په ویډیو کې د سارا شریف پلار لیدل کېږي، چې غلی ناست دی او میره یې د کتابچې له مخې بیان لولي.

یاده ویډیو کې د سارا میره د پاکستان پولیس په ځورونې تورنوي.

دا وايي، پاکستاني پولیس د هغې د کورنۍ نور غړي ډاروي او په ناقانوني توګه یې بندیان کوي او په کورونو یې چاپې اچوي.

بینش بتول په خپل بیان کې ویلي، چې د پټیدو لامل وېره وه.

دا وايي، وېریدل، چې د پاکستان پولیس یې په بې رحمۍ سره ونه وژني.

د پاکستان پولیس یاد تورونه ردوي.