نيمروز پخوا ارام ولايت و، خو په تېر يو کال کې د تاوتريخوالي لمن دغلته هم ور غځېدلې

په نيمروز کې چارواکي وايي تېره شپه (د مارچ ٤) د خاشرود په عليزيو سيمه وسله والوطالبانو بريد کړى چې په پايله کې يې درې امنيتي پوليس وژ ل شوي دي .

د نيمروز والي غلام دستگير ازاد ددې خبر پخلى کړى او ويلي يې دي چې د طالبانو د مرگ ژوبلې په اړه معلومات نه لري .

تېره اوونۍ هم د خاشرود ولسوالۍ په اړونده سيمه نالان کې وسله والو طالبانو پر يوې امنيتي پوستې بريد کړى وو چې له امله يې څلور وسله وال طالبان ووژل شول .

بل پلو د سيمه ييزو خلکو په وينا تېره شپه د همدې ولسوالۍ په اړوندو سيمو کې بهرنيو ځواکونو دوه کسان ونيول او له ځانه سره يې نامعلوم ځاى ته ولېږدول .

خو د نيمروز ولايت چارواکي وايي دغه دوه کسان يې له طالبانو سره د مرستې په تور نيولي دي .

همداشان تېره شپه د نيمروز مرکز زرنج ښارگوټي ته نژدې يو ماين وچاودېد .

د چارواکو پروينا دې چاودنې مرگ ژوبله نه ده اړولې او لا تراوسه دا نه ده معلومه چې دغه ماين تازه خښ کړاى شوى وو او که پخوانى و .

دغه ولايت چې له گاونډي ايران سره گډه پوله لري ،د مخدره توکو قاچاق کوونکي هم په کې ډېر فعال ښودل کېږي .

له دې وړاندې نيمروز دافغانستان د ډېرو ولايتونو په نسبت ارام بلل كېده. خو په دې ورستيوكې د تاوتريخوالي لمن دغه ارام ولايت ته هم غځېدلې ده .