په نيمروز ولايت کې هندوستاني سړک جوړونکي په کار بوخت دي

چارواکي وايي د سړک جوړونکو پر يوۀ کاروان لومړى د رموټ کنټرول په مټ چاودېدونکى توکى چاودلى چې کاروان يې درولى دى .

ورپسې ځانمرگى بريد شوى چې اووه کسان يې وژلي او يو شمير نور يې ټپيان کړي دي .

د ځايي چارواکو له خولې ويل شوي چې په وژل شويو کې يو هندى کارکوونکى دى او نور افغان ساتونکي دي .

په ټپيانو کې هم د دوو هندي کارکونکو يادونه کيږي .

خو د کورنيو چارو د وزارت وياند زمري بشري بي بي سي پښتو وېبپاڼې ته وويل چې د دوى له معلوماتو سره سم په دغۀ بريد يوازې درې کسان ټپيان شوي دي .

ښاغلي بشري د مړينو او نورو جزيياتو خبر سملاسي نه درلود .

دا د ٢٠٠٨ کال لومړنى ځانمرگى بريد دى چې په افغانستان کې ترسره کيږي .

د رپوټونو تر مخه په ٢٠٠٧ کال کې ١٣٧ ځانمرگي بريدونه په دغه هيواد کې شوي و چې تر ډيره يې ولسي کسان وژلي و .